İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 289 Hüküm no: 320 Orijinal metin no: [66a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mirası Beytülmala kalan Hüseyin’in Mustafa evkafına borcu olduğu İşbu kitâb-ı sıhhat sedâd-ı ensâbın derûnunda mastûr ve mukayyed olduğu üzere el-Hâc Mustafa b. Hızır evkāfına mütevellî olan Hayreddin b. Turgud tarafından husûs-ı âti’l-beyâna vekîl olup vekâleti nehc-i şer‘î üzere sâbite olan Mehmed b. Ramazan meclis-i şer‘-i kavîmde mahmiye-i Kostantıniyye’de Beytü’l-mâl-i Hâss Emîni olan aynü’l-a‘yân Abdullah Çavuş b. Hızır muvâcehesinde ikrâr ve takrîr-i kelâm kılıp bundan akdem mahmiye-i merkūme mahallâtından Emin Sinan mahallesinde sâkin iken vefât eyledikde muhallefâtı Beytü’l-mâl-i mezbûr cânibinden zabt olan el-Hâc Hüseyin b. Mustafa’nın zimmetinde isbât eyledikde vakf-ı mesfûr mâlından bin beş yüz akçei vekâletim hasebiyle bi’t-tamam ve’l-kemâl emîn-i mûmâ-ileyh yedinden alıp kabz eyledim zimmetinde bir akçe ve bir habbe kalmadı dedikde mâ-vaka‘a kayd olundu. Tahrîren fi’t-târihi’l-mezbûr Şühûdü’l-hâl: Mevlana Ahmed Efendi b. Mehmed, Hacı Çelebi b. Mehmed, Ahmed Çelebi b. Osman, Mustafa b. İlyas.