İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 289 Hüküm no: 321 Orijinal metin no: [66a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mirası Beytülmala kalan Hüseyin’in Yusuf b. Abdullah’a olan borcu İşbu kitâb derûnunda mastûr ve mukayyed olduğu üzere mahmiye-i Kostantıniyye mahallâtından Emin Sinan mahallesinde sâkin iken vefât eyledikde muhâllefâtı Beytü’l-mâl-i Hâs cânibinden zabt olan el-Hâc Hüseyin b. Mustafa’nın zimmetinde sandukluk levh bahâsından üç bin akçe isbât eyleyen Yusuf b. Abdullah nâm kimesne meclis-i şer‘de mahmiye-i mezbûrede Beytü’l-mâl-i hâss emîni olup müteveffâ-yı mezbûrun muhallefâtına vâzı‘ü’l-yed olan aynü’l-a‘yâ[n] Abdullah Çavuş b. Hızır mahzarında ikrâr edip müteveffâ-yı merkūm zimmetinde isbât eylediği üç bin akçeyi bi’t-tamam ve’l-kemâl alıp kabz eyledim. Zimmetinde bir akçe ve bir habbe bâkī kalmadı dedikde mâ-hüve’l-vâki‘ kayd olundu, Tahrîren fi’t-târihi’l-mezbûr Şühûdü’l-hâl: es-Sâbikūn.