İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 291 Hüküm no: 324 Orijinal metin no: [66b-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muharrem Ağa’nın evini Saliha Hatun’a sattığı Elhamdülillâhi’llezî ce‘ale’l-bey‘a sebeben li’n-nizâm ve’t-temlike ve’t-temellüke vesileten ilâ-husûli’l-merâm, ve’s-salâtü ve’s-selâmü alâ-nebiyyinâ Muhammedin seyyidi’l-enâm ve alâ-âlihi’l-izâm ve ashâbihi’l-kirâm ammâ ba‘d. İşbu mazmûnunda bey‘ ikrârından bahseden elfâz ve me‘ânî cihetinden sahîh ve şer‘î bir hüccet, usûl ve mebânî cihetinden sarîh ve mer‘î bir vesîkadır. İftihâru eshâbi’l-izzi ve’t-temkîn muhtâru’l-havâssi ve’l-mukarrebîn zi’ş-şâni’l-emced Muharrem Ağa b. Ahmed kıbelinden âti’z-zikr bey‘i ikrâra vekâleti fahrü’l-eimmeti’l-kirâm Abdi Halîfe b. Hamza ve Ali b. Ahmed el-müezzin nâm kimselerin şehâdeti ile sâbit olan merhûm Davud Paşa Evkāfı kâtibi Cafer Çelebi b. Abdülmennan meclis-i şerî‘at-i şerîfe-i garrâ ve mahfil-i tarîkat-i münîfe-i zehrâya hâzır olup şöyle ikrâr ve i‘tirâf eyledi ki, müvekkil-i mûmâ-ileyhi işbu akdin kendilerinden sudûruna kadar mâliki olduğu ve taht-ı tasarrufunda bulundurduğu, Dârü’s-saltanati’s-seniyye mahmiye-i Kostantıniyye mahallâtından Kıvrak Mahmud mahallesinde kâin, tahtânî ve fevkānî ikişer hâneyi, kileri, hamamı, su kuyusunu, muhavvatayı, kenîfi, eşcâr-ı müsmire ve gayri müsmireli bahçeyi hâvî, hudûdu bir tarafından Mehmed Çelebi b. ( ) el-haffâf mülkü, bir tarafından Hüsrev b. Abdullah mülkü, bir tarafından Cafer Çelebi b. Abdullah mülkü ve bir tarafından Silahdâr Derviş b. Yusuf mülkü ve tarîk-ı âm ile mahdûd bulunan cemî‘ menzilini cümle tevâbi‘i ve levâhıkı ve kâffe-i tarâikı ve merâfıkı ile râyicü’l-vakt yetmiş beş bin akçe semen-i mu‘ayyen-i makbûzla fahrü’l-muhadderât zahrü’l-muvakkarât Saliha Hatun bt. Süleyman’a bey‘-i bâtt-ı sahîh-i şer‘î ile bey‘ eyledi. O dahi kendi mâlıyla ve kendisi için iştirâ eyledi. Vâki‘ ikrâr müşteriyye-i merkūme kıbelinden tasdîka vekâleti Mehmed Çelebi b. Kasım el-imâm ve Şükrü b. Yusuf’un şehâdeti ile bimâ hüve nehcü’s-sübût şer‘an sâbit olan Hasan Çelebi b. Abdülmennan el-cündî tarafından vicâhen ve şifâhen tasdîk edildi. Cerâ zalike ve hurrire fi’t-târihi’l-mezbûr. Şühûdü’l-hâl: Ahmed b. Salih, Yusuf b. Cafer, Murad b. Kurd, İbrahim b. Abdi, Abdi b. Hamza, Mustafa b. Alagöz, Ali b. Ahmed, Mehmed b. Hasan