İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 290 Hüküm no: 323 Orijinal metin no: [66b-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muhallefatı Beytülmal tarafından zabtedilen Hasan’ın diğer hanımına da mehir borcu olduğu Sinan b. Mehmed ve Cafer b. Abdullah nâm kimseler meclis-i şer‘a hâzırân olup mahmiye-i Kostantıniyye mahallâtından Elvanzâde mahallesinde bundan akdem vefât eden merhûm Muslihuddin b. ( )’nin muhallefâtına vâzı‘-ı yed olan Dârü’s-saltanati’s-seniyye mahmiye-i Kostantıniyye’de vâki‘ Beytü’l-mâl-i hâs emîni Abdullah Çavuş b. Hızır mahzarında, Rahime bt. Sefer nâm hatun kıbelinden husûs-ı âti’l-beyâna vekâleti bimâ hüve nehcü’s-sübût şer‘an sâbit olan bâ‘is-i sicil Hasan b. Abdullah’dan sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, müvekkile-i mezbûre Rahime hatunun esnâ-yı nikâhında ma‘kūdun aleyh olan mehr-i müecceli cihetinden müteveffâ-yı mezbûr zevci üzerinde râyicü’l-vakt üç bin akçe hakkı vardır. Hakkını kısmen veyâ tamamen ahz ü kabz etmediğine, zevcinin hâl-i hayatında hakkını başkasına havâle etmediğine, zimmetini bi-vechin mine’l-vücûhi şer‘iye ibrâ etmediğine dâir müdde‘iye-i merkūme tahlîf edilmeğin gıbbe ri‘âyeti şerâiti’l-kabûl şehâdetleri mûcebince hükmedildi. Cerâ zalike fi’t-târihi’l-mezbûr. Şühûdü’l-hâl: Mehmed b. Ramazan, Mustafa b. Mahmud, Mustafa b. İlyas, Ferhad b. Abdullah