İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 309 Hüküm no: 357 Orijinal metin no: [71a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mirası Beytülmala kalan Nesime’nin emanet parasının teslim edildiği Dâr-ı saltanat-ı seniyye mahmiye-i Kostantıniyye’de bi’l-fi‘il Beytü’l-mâl-i hâssa emîni olan Abdi Çavuş b. Hızır mahmiye-i merkūme mahallâtından Sancakdâr Hayreddin mahallesi sâkinlerinden Fatıma bt. Topçu Ahmed nâm hatunun tasdîk-i âti’l-beyâna vekîli olup vekâleti nehc-i şer‘î üzere sâbite olan el-Hâc Ömer b. İlyas mahzarında ikrâr ve takrîr-i kelâm edip mahalle-i merkūme sâkinlerinden iken vefât edip metrûkâtı mîrî cânibine âid olan Nesime bt. Ali nâm müteveffiyenin vekîl-i merkūmun müvekkilesi yedinde bi-tarîki’l-emâne beş bin fıddî akçesi var imiş. Hâlen vekîl-i merkūm meblağ-ı mesfûru getirip mîrî cânibine teslîm edip ben dahi bî kusûr ahz ü kabz etdim dedikde mâ-vaka‘a kayd-şüd. Fi’t-târihi’l-mezbûr. Şühûdü’l-hâl: Mehmed b. Bostan el-imâm, Pîrî Halîfe b. Murad el-imâm, el-Hâc Ali b. Murad, Mustafa b. Abdi, İsa b. Mehmed, Mustafa b. Ahmed el-imâm, el-Hâc Pîr b. Halil ve gayruhum.