İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 309 Hüküm no: 356 Orijinal metin no: [71a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Musa b. İsa’nın mallarının öldüğü zannıyla Beytülmal adına satılması İşbu bâ‘isü’l-kitâb (…) el-Hâc Musa b. İsa meclis-i şer‘-i şerîf-i mübîn-i şâmihü’l-imâdda bi’l-fi‘il mahrûse-i İstanbul’da Beytü’l-mâl-i Hâs Emîni olan a‘yü’l-a‘yân Abdullah Çavuş (…) vekâleti fahrü’l-muharrirîn İbrahim Bey b. Abdulmuin muvâcehelerinde tasvîr-i da‘vâ kılıp bundan esbak mahrûse-i merkūmede Papasoğlu Hanı’nda el-Hâc Mehmed yedinde beş denk emânet vaz‘ edip Rumeli cânibine ticârete gitdiğimde vefâtım şâyi‘ olmağla emîn-i mezkûr zikr olunan yünü Beytü’l-mâl için zabt etmişdir. Hâlâ hakk-ı sarîhim olmağın taleb ederim dedikde emîn-i merkūm fi’l-vâki‘ Hân-ı mezkûrda el-Hâc Mehmed yedinde beş yüz kırk beş vakıyye yün olup Hacı Musa nâm kimesnenin hakkıdır vefât etmişdir deyü ba‘zı kimesneler haber vermekle zikr olunan yünün bey‘ olunması fermân olundukdan sonra her vakıyyesin yüz kırk akçeye bey‘ olunup semeni kabz eyledim. Lâkin yün sâhibi müdde‘î-yi mezbûr idiği ma‘lûmum değildir isbât eylesin deyü cevâb vermeğin işhâd-ı şer‘îden sonra udûl-i Müslimînden el-Hâc Mehmed b. Ömer ve el-Hâc Mahmud b. el-Hâc Hamza ve el-Hâc Yusuf b. Abdullah nâm kimesneler li ecli’ş-şehâde hâzırûn fi’l-meclis olup zikr olunan yün müdde‘î-yi merkūm el-Hâc Musa’nın mülk-i sahîh ve hakk-ı sarîhi olduğuna şâhidleriz şehâdet dahi ederiz dediklerinde ba‘de ri‘âyeti şerâiti’l-kabûl mezkûrûn şâhidlerin şehâdetleri makbûle olup mûcebiyle hükmolundukdan sonra kayd olundu. Tahrîren fî-evâsıtı şehr-i Rebî‘ü’l-âhir li-sene selâse ve elf. Şühûdü’l-hâl: Mevlana Ahmed Efendi el-müderris, Mevlana Hacı Efendi b. Mehmed, Mevlana Ahmed Efendi el-müsta‘id, Mustafa b. İlyas.