İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 313 Hüküm no: 364 Orijinal metin no: [72a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Behram Kethuda’nın azatlısı Aydın Abdullah’ın mirası Bundan esbak merhûm Rüstempaşa kethudâsı iken vefât eyleyen merhûm Behram Kethudâ’nın sulbî oğullarından İbrahim Çelebi asâleten ve diğer oğullarından Mehmed Bey ve Ömer Bey taraflarından husûs-ı âtîye vekîl olup vekâlet-i mahkiyesi Piyale Bey b. Abdullah ve Ahmed b. Hamza şehâdetleri ile nehc-i şer‘-i kavîm üzere sâbite olan yine merhûm-ı merkūmun oğlu Mahmud Çelebi asâleten ve vekâleten meclis-i şer‘-i münîr-i şâmihü’l-imâd ve mahfil-i dîn-i metîn-i râsihü’l-evtâde hâzırân olup Bezzâzistân-ı atik bâzergânlarından işbu kitâb-ı sıhhat-nisâb fahrü’t-tüccâr ve zahrü’l-ahyâr Hüseyin Çelebi b. Hasan muvâcehesinde ikrâr ve takrîr-i kelâm edip merhûm-ı müşârün-ileyh babamız utekāsından Aydın Abdullah nâm za‘îm sefer-i hümâyûnda şehîd olup verâseti babamız utekāsından olmağla bize münhasıra olup verâsetimiz Dîvân-ı hümâyûn-ı sa‘âdet makrûnda şer‘an sâbite olmağın hâlâ müteveffâ-yı merkūmun mezkûr Hüseyin Çelebi uhdesinde esbâb bahâsından olan kırk sekiz bin akçei ve mezkûr yedinde emânet vaz‘ olan bir gümüşlü gaddâresini verâsetim hasebiyle bi’t-tamam ve’l-kemâl alıp kabz eyledik dediklerinde vech-i meşrûh üzere vâki‘ olan ikrârların mukarrun lehü’l-mezbûr bi’l-muvâcehe ve’l-müşâfehe tasdîk ve tahkīk etdikden sonra mâ-hüve’l-vâki‘ kayd olundu. Tahrîren fî-evâili Cemâziyelevvel li-sene selâse ve elf. Şühûdü’l-hâl: Hoca Piyale b. Abdullah, Mehmed Çelebi eş-şehîr bi Sükûfîzâde, Hızır Bey b. Mustafa, İbrahim Çelebi b. Mustafa, Mustafa Çavuş eş-şehîr bi Kâtibzâde, el-Hâc Mustafa, Sefer Çelebi b. Ramazan, Mehmed Çelebi b. Ramazan, Mustafa b. Mahmud.