İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 320 Hüküm no: 377 Orijinal metin no: [74b-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terekesi Beytülmal tarafından zabtedilen Mehmed Çavuş’un hanımına mehir borcu olduğu (…) nâm kimseler meclis-i şer‘a hâzırân olup mahmiye-i Kostantıniyye mahallâtından Akbıyık mahallesinde bundan akdem vefât eden merhûm Mehmed Çavuş b. Abdullah’ın muhallefâtını zabt eden, mahmiye-i mezbûrede vâki‘ Beytü’l-mâl-i hâs emîni Mehmed Bey b. Abdullah mahzarında, müteveffâ-yı mezbûrun zevcesi ve vârisi Rabia Hatun bt. el-Hâc Yusuf’dan sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, müteveffâ-yı mezbûrun zimmetinde esnâ-yı nikâhında ma‘kūdun aleyh olan mehr-i müeccel cihetinden müdde‘iye-i merkūme zevcesine râyicü’l-vakt on bin akçe deyni vardır. Hakkını kısmen veyâ tamamen ahz ü kabz etmediğine, zevcinin hâl-i hayatında hakkını başkasına havâle etmediğine, zimmetini bi-vechin mine’l-vücûhi şer‘iye ibrâ etmediğine dâir müdde‘iye-i merkūme tahlîf edilmeğin gıbbe ri‘âyeti şerâiti’l-kabûl şehâdetleri mûcebince hükmedildi. Cerâ zâlike ve hurrire fi’l-yevmi’l-hâdî ve’l-ışrîn min-şehri Saferi’l-muzaffer li-sene hamse ve elf. Şühûdü’l-hâl: Kıdvetü’l-müderrisîn İsmail Efendi, umdetü’l-müdakkıkīn Ahmed Efendi, Ahmed b. Ali, Yusuf Çelebi b. Abdüllatif, Mehmed Çelebi b. Ahmed el-kâtib, Mehmed b. Mehmed, Mehmed b. Ramazan, Mustafa b. Mahmud ve gayruhum