İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 321 Hüküm no: 378 Orijinal metin no: [74b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gürcü asıllı Kevyan’ın Fatıma Hatun tarafından azat edildiği Umdetü’l-muhadderât zübdetü’l-muvakkarât Fatıma Hatun bt. Abdülmennan kıbelinden husûs-ı <<âti’z>> âti’z-zikri ikrâra nehc-i şer‘î üzere vekâleti Yusuf Bey b. Abdullah ve Receb Bey b. Abdullah nâm sipâhîler şehâdetleri ile sâbite olan aynü’l-a‘yân Yusuf Bey b. Abdülmennan nâm za‘îm meclis-i şer‘-i kavîmde işbu hâzır bi’l-meclis orta boylu açık kaşlı karayağız ve kara gözlü kara sakallı Gürciyyü’l-asl Keyvan b. Abdullah mahzarında takrîr-i kelâm ve bast-ı merâm edip sıfât-ı mezbûre ile mevsûf olan mezbûr Keyvan müvekkilem müşârün-ileyhâ Fatıma Hatun bt. Abdülmennan’ın abd-i memlûkü iken mezbûr Keyvan ben kızılbaş cinsindenim hür bin hürüm deyip lâkin hürriyet-i asliyesini nehc-i şer‘î üzere isbât <> edemeyip hâlâ müvekkilem mezbûre Fatıma Hatun hasbeten lillâhi’l-aliyyi’l-azîm ve haseneten li rûhi resûlihi’l-kerîm abd-i memlûkü olan mezbûr Keyvanı asl-ı mâlından ve mahz-ı menâlinden i‘tâk ve tahrîr eyledi. Ba‘de’l-yevm mezbûr Keyvan sâir ahrâr-ı asliyîn gibi hürdür deyü bi’l-vekâle ikrâr-ı şer‘î ve i‘tirâf-ı mer‘î <<üzere>> etdikde mâ-hüve’l-vâki‘ gıbbe’t-tasdîk ve ba‘de’t-taleb ketb olundu. Fi’l-yevmi’r-râbi‘ ve’l-ışrîn fî-Safer li-sene hamse ve elf. Şühûdü’l-hâl: İbrahim Çavuş [b.] Abdullah, Bilal Ağa b. Abdullah, Yusuf el-müezzin, Mehmed b. Ramazan, Mustafa [b.] Mahmud, Mustafa [b.] İlyas, Ferhad [b.] Abdullah ve gayruhum.