İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 324 Hüküm no: 384 Orijinal metin no: [75a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saliha bt. Hüseyin’den çocukları Yusuf ve Fatıma’ya intikal eden ev Mahmiye-i İstanbul’da Demirciler mahallesinde bundan akdem vefât eden Saliha bt. Hüseyin’in verâseti sulbî oğlu Yakub b. Yusuf’a ve sulbiye kızı Fatıma bt. Yusuf’a münhasıra olup mezbûr Yakub mahfil-i kazâda li-ebeveyn kız karındaşı mezbûre Fatıma mahzarında bi’t-tav‘ ve’r-rızâ ikrâr edip mezbûre Fatıma bi’l-fi‘il mahalle-i mezbûrede mutasarrıfa olup sâkine olduğu bir tahtânî evi ve iki fevkānî evleri ve kenîfi ve muhavvatayı müştemil olup hudûdunun bir tarafı Hasan b. Mehmed ve bir tarafı Pîrî b. Abdullah ve bir tarafı Sâkine bt. Mehmed ve taraf-ı âharı tarîk-i âmma müntehî olan mülk menzili vâlidem mezbûrenin mülk-i sarîhidir. Sülüsânı bana intikāl eder deyü da‘vâ etdiğimde mezbûre Fatıma menzil-i merkūmu bundan esbak Sâkine bt. Mehmed’den yirmi dört bin akçeye iştirâ etdim, mülk-i mahzımdır. Bu kazâyı nâtık yedimde hüccet-i şer‘iyem vardır deyü sâbıkā mahmiye-i mezbûre kādısı olan a‘lemü’l-ulemâ merhûm Ali Efendi b. Abdullah imzâsıyla mümzât ve hâtemi ile mahtûm ve dokuz yüz doksan dokuz Cemâziyelevveli’si evâsıtı ile müverrah hüccet-i şer‘iye ibrâz edip mazmûn-ı hüccet-i merkūm fi’l-hakīka kız karındaşı olan mezbûre Fatıma menzil-i mezbûru Sâkine bt. Mehmed’den makbûzu yirmi dört bin akçeye iştirâ etdiğini mutazammın olup ben geri menzil-i merkūm vâlidemin mülkü idiğini da‘vâ edip lâkin isbât edememeğin beynimizde münâza‘ât-ı kesîre vâkı‘a olmuş idi. El-hâletü hâzihî [75b] muslihûn tavassut edip mâ-beynimizi (…) bedel-i sulh olan meblağ-ı mezbûru meclis-i sulhda mezbûre Fatıma yedinden bi’t-tamam ve’l-kemâl alıp kabz eyledim. Ba‘de’l-yevm husûs-ı mezbûra müte‘allik da‘vâdan zimmetini ibrâ-i âm ve iskāt-ı tam ile ibrâ ve iskāt eyledim. Menzil-i mezbûr merkūme Fatıma’nın mülk-i mahzı ve hakk-ı sırfıdır bi-vechin mine’l-vücûh benim medhalim yokdur. Yine benden bi’l-asâle ve bi’l-vekâle menzil-i mezbûra müte‘allik da‘vâ sudûr ederse lede’l-hükkâmi’l-kirâm mesmû‘a olmaya dedikde gıbbe’t-tasdîk ve ba‘de’t-taleb ketb olundu. Fi’l-yevmi’s-sâmin min-Rebî‘ü’l-evvel li-sene hamse ve elf. Şühûdü’l-hâl: Mehmed b. Abdullah, Halil Çavuş b. Mehmed el-mübâşir, Aydın Efendi b. Ebilgays, Fahrü’l-müderrisîn Ahmed Efendi b. Mehmed, Yusuf b. Abdullah.