İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 326 Hüküm no: 387 Orijinal metin no: [75b-3, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terekesi Beytülmal tarafından zabtedilen Behram b. Abdullah’ın vasiyeti bulunduğu Mustafa Bey b. Abdünnebi ve Ebûbekir b. Mustafa ve bevvâb-ı sultânî Osman Çelebi b. Abdünnebi ve mahmiye-i Kostantıniyye’de vâki‘ Emin bey mahallesi imâmı Resul Efendi b. Fazlullah ve müezzin Mehmed b. Hasan nâm kimseler meclis-i şer‘-i şerîfe hâzırûn olup, mahalle-i mastûrede bundan akdem vefât eden zırhcı merhûm Behram b. Abdullah’ın muhallefâtına vâzı‘-ı yed olan mahmiye-i mezbûrede vâki‘ Hâssa Cebecilere mahsûs Beytü’l-mâl emîni Receb Çelebi b. Hamza’nın mahzarında ve yine umdetü’l-a‘yân mukāta‘acı Mahmud Efendi b. Ali’nin mahzarında ve yine Dîvân-ı âlî kıbelinden müteveffâ-yı mezbûrun muhallefâtını kabza memûr makbûlü’s-sudûr ve’l-erkân zevvâk-ı sultânî Mustafa Ağa b. Abdullah’ın mahzarında, mahalle-i mesfûre sükkânından hâmil-i kitâb Abdullah b. Ali’den sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, müteveffâ-yı mezbûr Behram b. Abdullah maraz-ı mevte yakalanıp başını mevt yastığına koyduğunda, dünyânın fânî âhiretin bâkī olduğunu idrâk edip ba‘zı emvâlini vücûh-ı hayrâta bezl edip âhiret azığı tedârik etmek istedi ve sülüs-i cemî‘ mâlının ve mahz-ı menâlinin sunûf-i meberrâta sarf edilmesini vasiyet etti. Bunun altı bin akçesini irtihâlinden sonra eyyâm-ı mu‘tâdede it‘âm-ı fukarâya ta‘yîn etti. Yirmi bin akçeyi eczâ-i şerîfeye ta‘yîn eyledi. Beş utekāsının her birine beş bin akçe ta‘yîn eyledi. Bu mesârifden artanı avârız-ı mahalle-i mezbûreye ta‘yîn eyledi. Müdde‘î-yi mezbûr Abdullah b. Ali’yi de vesâyâsının tenfîzine vasîyy-i muhtâr seçti. Müteveffâ-yı mezbûr vasiyetinden dönmeden vefât eyledi. Şehâdeten sahîhaten şer‘iyeten makbûleten ba‘de ca‘li şerâiti’l-kabûl mer‘iyeten şehâdetleri mûcebince vasiyetin sıhhatine hükmedildi. Cerâ zâlike ve hurrire fî-evâili Rebî‘i’l-evvel. Şühûdü’l-hâl: Mustafa Çelebi b. Derviş, Halil b. Ramazan, Mustafa b. Mahmud, Hasan Çelebi b. Ali, Mustafa b. Yusuf, el-Hâc Mehmed b. Abdullah, Ali b. Abdullah, Mustafa Bey b. Ahmed, Abdüllatif b. Yusuf