İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 327 Hüküm no: 389 Orijinal metin no: [76a-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terekesi Beytülmal tarafından zabtedilen Nefise Hatun’un evinin müzayede ile satıldığı Mahmiye-i Kostantıniyye mahallâtından Sancakdâr Hayreddin mahallesinde bundan akdem vefât eden merhûme Nefise Hatun bt. Abdullah’ın muhallefâtına vâzı‘ü’l-yed olan mahmiye-i mezbûrede vâki‘ Beytü’l-mâl-i hâs emîni Mehmed Bey b. Abdülmennan ve müteveffât-ı mezbûrenin zevci ve vârisi Ahmed b. Abdullah meclis-i şer‘a hâzırân olup müteveffât-ı mezkûrenin muhallefâtında mevcûd, mahalle-i merkūmede kâin, fevkānî ve tahtânî birer hâneyi, eşcâr-ı müsmireli bahçeyi, kenîfi ve muhavvatayı hâvî, hudûd-ı erba‘ası bir tarafından Hüma Hatun bt. Abdullah mülküne, bir tarafından vakfa, bir tarafından Hızır b. Kurd mülküne, bir tarafından tarîk-ı âmma müntehî bulunan cemî‘ menzili cümle hudûdu ve menâfi‘i ve kâffe-i tevâbi‘i ve levâhıkı ile râyicü’l-vakt on iki bin akçe semen-i mu‘ayyen-i makbûzla atebe-i aliyye müteferrikalarından bâ‘isü’l-kitâb umdetü’l-emâcid ve’l-ekârim zi’l-kadri’r-râsih ve’ş-şerefi’ş-şâmih Mehmed Ağa b. Abdülmennan’a îcâb ve kabûlü hâvî bey‘-i bâtt-ı sahîh-i şer‘î ile bey‘ ettiklerini emâneten ve verâseten ikrâr ve i‘tirâf eylediler. Mezbûr Mehmed Ağa dahi kendi mâlıyla ve li-nefsihî menzil-i mezkûru iştirâ eyledi. Mubâya‘a-i mezbûre menzil-i mesfûrun sûk-ı sultânîde ve mecma‘-ı nâs olan mahallerde tâlibîn ve râgıbîn beyninde kirâren müzâyede olunup ragabât-ı nâs bi’l-külliye münkatı‘a oldukdan sonra müşârün-ileyh Mehmed Ağa üzerinde semen-i meblağ-ı merkūmda karâr edip ziyâde ile âhar tâlibi olmadığı ecilden vâki‘ oldu. Cerâ zâlike ve hurrire fî-evâsıtı Rebî‘i’l-evvel li-sene hamse ve elf. Şühûdü’l-hâl: Mehmed b. Sinan el-imâm, Pîrî b. Murad el-imâm, Mehmed b. Ahmed el-müezzin, Hüseyin b. Ali el-müezzin, Sefer Bey b. Cafer, Ömer b. el-Hâc Ahmed, Nuri b. Hüseyin, Mehmed b. Ahmed, Osman b. Ahmed ve gayruhum