İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 334 Hüküm no: 397 Orijinal metin no: [77b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bostancılar Kethudası Bayram Kethuda’nın borcu Atebe-i aliyye’de bi’l-fi‘il Bostancılar Kethudâsı olan umdetü’l emâcid Bayram Kethudâ b. Abdülmennan kıbelinden husûs-ı âti’z-zikri ikrâra hasm-ı şer‘î mahzarında Mustafa b. Mehmed ve İmâm Mevlana Mirza b. Mehmed şehâdetleriyle vekâleti isbât eden fahrü’l-müderrisîn Zekeriya Efendi b. Kılıç meclis-i şer‘-i şerîfde mahrûse-i İstanbul’da Demirkapı kurbünde Dâye Hatun mahallesinde sâkine olan Koca Hatun bt. Abdullah’ın vakf edip şart-ı vâkıfe nâzır ve vekîli olup bi’l-fi‘il Hâssa Sipâhîlerbaşı olan fahr-i erbâbi’l-izzi ve’l-ikbâl zahr-ı ashâbü’s-sa‘âdeti ve’l-iclâl zü’l-mecdi’r-râsih ve’ş-şerefi’ş-şâmih umdetü’l-havâs ve’l-mukarrebîn zübdet-i erbâbi’l-izzi ve’l-mekîn Hazret-i Ferhad Ağa b. Abdulmuin kıbelinden tasdîk-i âti’z-zikre vekîl olup bimâ hüve nehcü’s-sübût vekâleti sâbite olan Zünnûn b. Hızır nâm müderris mahzarında bi’l-vekâle ikrâr-ı şer‘î edip müvekkilim mezbûr Bayram Kethudâ’nın zimmetinde karz-ı şer‘îden mezbûre Koca Hatun vakfından iki yüz bin akçe ve vakfından gayri kendi mâlından yüz kırk bin akçe cem‘an üç yüz kırk bin akçe lâzım deyni vardır meblağ-ı mecmû‘-ı merkūmu nâzır-ı müşârün-ileyh hazretlerinden kabz ve tesellüm edip meblağ-ı merkūm mukābelesinde mahalle-i merkūmede vâki‘ olan inde’l-cîrân ma‘lûmü’l-hudûd ve’l-müştemilât mülk menzilini nâzır-ı mûmâ-ileyh yedine rehn vaz‘ eyledikden sonra mâ-hüve’l-vâki‘ gıbbe’t-tasdîk ve’t-taleb kayd olundu. Tahrîren fî 6 Rebî‘ülâhir sene 1005. Şühûdü’l-hâl: Ahmed b. Mustafa, Kılıç b. Abdullah, Davud Ağa b. Abdullah, Muslihiddin b. Receb, Mustafa b. Mehmed, Mehmed b. Mustafa, Ali b. İskender, Abdullah el-imâm, Mustafa el-müezzin, Mehmed b. Mehmed, Ali b. Süleyman ve gayruhum.