İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 335 Hüküm no: 399 Orijinal metin no: [78a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uncu Mustafa b. İlyas’ın borcunun muhallefatından verilmesi Fahrü’l-akrân Mustafa Çelebi b. Ahmed mahfil-i kazâda bundan esbak vilâyet-i Eflah’da vefât eden Uncu Mustafa b. İlyas’ın zevcesi ve vârisesi olup sulbiye kızı Âişe’ye kıbel-i şer‘den <> sâbıkā vasî nasb olunan Âbide Hatun bt. Mehmed nâm tarafından ikrâr-ı âti’z-zikri tasdîka vekîl olup vekâlet-i hasm-ı şer‘î mahzarında bimâ hüve nehcü’s-sübût şer‘an sâbite olan Mustafa Bey b. Abdullah mahzarında ikrâr edip müteveffâ-yı mezbûr zimmetinde emti‘a-i mütenevvi‘a bahâsından altmış bin akçe hakkım olup muhallefâtından da‘vâ ve taleb edip şer‘ile vekîl-i mezbûr mahzarında isbât eylemiş idim. El-hâletü hâzihî meblağ-ı mezbûrdan on üç bin seksen üç akçeyi müteveffâ-yı mezbûrun esbâbı bahâsından alıp kabz eyledim dedikde mukırr-ı mezbûru ikrâr-ı meşrûhunda mukarrun lehü’l-merkūm vicâhen tasdîk edicek mâ-vaka‘a bi’t-taleb kayd-şüd. Fi’l-yevmi’r-râbi‘ min-Rebî‘ü’l-âhir li-sene hamse ve elf. Şühûdü’l-hâl: Mustafa b. Ahmed es-sarrâc, Muhyiddin Efendi [b.] Mustafa, Kasım b. Derviş, Ali b. Mustafa, Ahmed b. Ferhad ve gayruhum.