İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 336 Hüküm no: 401 Orijinal metin no: [78b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sinan Efendi’nin muhallefatından olan evinin satışı Mahrûse-i İstanbul’da (…) vefât eden merhûm Sinan Efendi b. Abdullah’ın eynemâ vücide ve haysümâ kâne muhallefâtının kabz ü zabtına Dîvân-ı âlî tarafından memûr olan fahrü’l-akrân Mehmed Bey b. Abdülmennan meclis-i şer‘-i şerîfde müteveffâ-yı mezbûrun zevcesi ve vârise[si] olan umdetü’l-muhadderât <> Saliha Hatun bt. Hüsrev Bey kıbelinden ikrâr-ı âti’z-zikri tasdîka vekîl olup hasm-ı şer‘î mahzarında bimâ hüve nehcü’s-sübût şer‘an vekâletini isbât eden fahrü’l-müderrisîn Mevlana Abdürrezzak Efendi b. Halil mahzarında takrîr-i merâm edip müteveffâ-yı mezbûrun cümle-i muhallefâtından olup mahmiye-i İskenderlerde [Üsküdar] Solak Sinan mahallesi kurbünde Bülbülderesi nâm mevzi‘de vâki‘ olup dâhiliyesi üç fevkānî evi ve üç sofayı ve bir hamamı ve bir matbahı ve su kuyusunu ve bir muhavvatayı müştemil olup bir tarafı Helâl Çelebi b. Derviş mülkü ve bir tarafı Sefer b. Abdullah mülkü ve bir tarafı yine müvekkilem mezbûre mülkü ve taraf-ı âharı tarîk-i hâs ile mahdûd ve mümtâz olan mülk menzili merrât-ı müte‘addide sûk-ı sultânîde mecâlis-i tâlibîn ve mehâfil-i râgıbîne arz olundukda bi’l-müzâyede yüz kırk bin akçe bahâsı ile müvekkile-i müşârün-ileyhâ Saliha Hatun üzerinde karâr edip ragabât-ı nâs dahi münkatı‘a olmağın rub‘ menzil-i merkūm alâ-mâ-farazallâhu te‘âlâ zevce-i mezbûrenin hisse-i şer‘iye-i mevrûsesinden olup erbâ‘-ı selâsesini hâlâ ben emânetim ve memûr olduğum hasebiyle yüz beş bin akçeye müvekkile-i mezbûreye bey‘-i <> bâtt-ı sahîh-i şer‘î ile bi-cümleti’t-tevâbi‘ ve’l-levâhık bey‘ edip teslîm-i mebî‘ eyledim ve Beytü’l-mâl-i mezbûr için semen-i mezbûru müvekkile-i mezbûre yedinden bi’t-tamam alıp kabz eyledim deyü ikrâr-ı tav‘î ve i‘tirâf-ı mer‘î etdikde mukırr-ı mezbûru ikrâr-ı meşrûhunda vekîl-i merkūm vekâleti hasebiyle vicâhen tasdîk edicek mâ-vaka‘a bi’t-taleb kayd-şüd. Fi’l-yevmi’s-sâmin ve’l-ışrîn min-şehri Rebî‘i’l-âhir li-sene hamse ve mi’e. Şühûdü’l-hâl: Mevlana Musa b. Ahmed el-imâm, Mahmud b. Ali el-müezzin, Mehmed b. Nasuh, el-Hâc İbrahim, Ahmed b. Receb, Hüseyin, Mehmed, Ramazan [b.] Mehmed ve gayruhum.