İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 337 Hüküm no: 402 Orijinal metin no: [78b-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ölen Sinan Efendi’nin hanımına mehir borcu olduğu Udûlden Ahmed Efendi b. Sinan ve el-Hâc Ferhad b. Abdülmennan nâm kimseler meclis-i şer‘a hâzırân olup bundan akdem tarîk-ı hâcda vefât eden Sinan Efendi b. Abdullah’ın muhallefâtına vâzı‘ü’l-yed olan mahmiye-i mezbûrede vâki‘ Beytü’l-mâl-i hâs emîni Mehmed Bey b. Abdülmennan mahzarında, müteveffâ-yı mezbûrun zevcesi ve vârisi umdetü’l-muhadderât Saliha Hatun bt. Hüsrev Bey kıbelinden da‘vâ, isbât, kabz ve îsâle vekâleti bimâ hüve nehcü’s-sübût şer‘an sâbit olan fahrü’l-müderrisîn mevlana Abdürrezzak Efendi b. Halil’den vekâleten sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, müteveffâ-yı mezbûr Sinan Efendi’nin zimmetinde esnâ-yı nikâhında ma‘kūdun aleyh olan mehr-i müeccel cihetinden müdde‘iye-i merkūme zevcesine râyicü’l-vakt altmış bin akçe deyni vardır. Hakkını kısmen veyâ tamamen ahz ü kabz etmediğine, zevcinin hâl-i hayatında hakkını başkasına havâle etmediğine, zimmetini bi-vechin mine’l-vücûhi şer‘iye ibrâ etmediğine dâir müdde‘iye-i merkūme tahlîf edilmeğin gıbbe ri‘âyeti şerâiti’l-kabûl şehâdetleri mûcebince hükmedildi. Cerâ zâlike ve hurrire fi’t-târihi’l-mezbûr. Şühûdü’l-hâl: Es-sâbikūn