İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 337 Hüküm no: 404 Orijinal metin no: [79a-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terekesi Beytülmal tarafından zabtedilen İnehan b. Abdullah’ın evinin müzayede ile satıldığı Sefer-i sultânîde bundan akdem vefât eden hâssa solaklar bölüğünden merhûm İnehan b. Abdullah’ın muhallefâtına vâzı‘-ı yed olan, mahmiye-i Kostantıniyye’de vâki‘ râcilîne mahsûs Beytü’l-mâl emîni Hüseyin Subaşı b. Mehmed kıbelinden vekâleti Mustafa b. Hüseyin ve Mirkulu b. Murad’ın şehâdetiyle sâbit olan (…) nâm kimse meclis-i şer‘-i şerîfe gelip şöyle ikrâr ve i‘tirâf eyledi ki, müvekkil-i mezbûru, müteveffâ-yı mezbûrun muhallefâtından olan, mahmiye-i Kostantıniyye mahallâtından Şeyh Ferhad mahallesinde kâin, dâhiliyesinde tahtânî ve fevkānî iki hâneyi, hâriciyede ahırı, su kuyusunu, odayı ve kenîfi müştemil bulunan, hudûdu bir tarafından Mehmed b. Sûfî mülkü, bir tarafından Fatıma Hatun bt. Abdullah mülkü, bir tarafından el-Hâc Ali mülkü, bir tarafından tarîk-ı âm ile mahdûd olan cemî‘ menzili cümle tevâbi‘i ve levâhıkıyla râyicü’l-vakt on beş bin akçe semen-i mu‘ayyen-i makbûzla bâ‘is-i tahrîr-i hâze’l-kitâb fahrü’l-emâcid ve’l-ekârim atebe-i aliyye müteferrikalarından Yahya Ağa b. Hakkı’ya îcâb kabûlü, teslîm tesellümü hâvî bey‘-i bâtt-ı sahîh-i şer‘î ile bey‘ eyledi. Mezbûr Yahya Ağa dahi bi-mâlihî li-nefsihî menzil-i mezkûru iştirâ eyledi. Vâki‘ ikrâr müşterî-yi mezbûr tarafından vicâhen ve şifâhen tasdîk edildi. Mubâya‘a-i mezbûre menzil-i mesfûrun sûk-ı sultânîde ve mecma‘-ı nâs olan mahallerde tâlibîn ve râgıbîn beyninde kirâren müzâyede olunup ragabât-ı nâs bi’l-külliye münkatı‘a oldukdan sonra müşârün-ileyh Yahya Ağa üzerinde semen-i meblağ-ı merkūmda karâr edip ziyâde ile âhar tâlibi olmadığı ecilden vâki‘ oldu. Cerâ zâlike ve hurrire fi’l-yevmi’l-hâdî ve’l-ışrîn min-Rebî‘i’l-âhir li-sene [100]5. Şühûdü’l-hâl: Şehsüvar b. A[bdullah], Mehmed Çelebi b. Sûfî, Cârullah b. İbrahim el-müezzin, Muharrem b. Mehmed, Mahmud Efendi el-imâm, Mehmed b. Ramazan, Mustafa b. Mahmud