İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 338 Hüküm no: 405 Orijinal metin no: [79a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Bey’in oğlunun vasisi tarafından talep edilen para Mahmiye-i İstanbul’da Keçeci Pîrî mahallesinde vefât eden Mustafa Bey b. Abdullah nâm cündînin sagīr-i sulbîsi Ali’nin ta‘dîl-i umûrı’çün hâkim-i şer‘i kıbelinden vasî nasb olunan Cafer Bey b. Abdullah nâm cündî mahfil-i kazâda müteveffâ-yı mezbûrun zevce-i metrûkesi Dildar bt. Abdullah mahzarında takrîr-i da‘vâ-yı şer‘iye edip işbu hâzır-ı meclis olan Kasab Süleyman b. Abdullah nâm kimesne zimmetinde müteveffâ-yı mezbûrun otuz üç bin akçesi olmağın meblağ-ı mezbûru vesâyetim hasebiyle taleb eylediğimde müteveffâ-yı mezbûrun zimmetinde ancak yirmi bin akçesi vardır mâ‘adâsı ki on üç bin akçedir merkū[me] Dildar bt. Abdullah’ındır deyü meblağ-ı mezbûr on üç bin akçeyi bana vermekde ta‘allül eder keyfiyet-i hâl merkūmeden dahi suâl olunsun dedikde gıbbe’s-suâl merkūme Dildar meblağ-ı mezbûr on bin akçe müteveffâ-yı merkūmun değildir deyü inkâr ile cevâb vermeğin vasîyy-i mezbûrdan da‘vâsına mutâbık beyyine taleb olundukda ikāme-i beyyineden âciz olup mezbûreye yemîn taleb eylemeğin meblağ-ı mezbûr on üç bin akçe kendi mülkü olup zevci müteveffâ-yı mezbûrun olmadığına mezbûre Dildar’a yemîn teklif olundukda half billâhi te‘âlâ eyleyip mâ-vaka‘a bi’t-taleb kayd olundu. Tahrîren fi’l-yevmi’s-sâmin ve’l-ışrîn min-Rebî‘i’l-âhir li-sene hamse ve elf. Şühûdü’l-hâl: Ahmed Efendi b. Ali, Mehmed Çelebi b. Ahmed, Yusuf Çelebi, Mehmed b. Ramazan, Mustafa b. Mahmud, Mustafa b. İlyas.