İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 352 Hüküm no: 426 Orijinal metin no: [82b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seferde şehit olan Topçubaşı Mehmed Çelebi’nin boşadığı karısının mirastan hisse talebi (…) sâkin olup işbu târih-i kitâbda vâki‘ olan sefer-i hümâyûnda şehîd olan Topçubaşı merhûm Mehmed Çelebi b. Kurd’un vâlidesi olan Şahhuban Hatun bt. Yusuf tarafından husûs-ı âti’z-zikre vekîl olup hasm-ı şer‘î mahzarında bimâ hüve nehcü’s-sübût şer‘an vekâletini isbât eden Bali Çelebi b. Yunus mahzarında takrîr-i merâm edip bundan esbak müteveffâ-yı mezbûr Mehmed Çelebi beş bin akçe mehr-i müeccel üzeri beni tezevvüc etmiş iken müvekkile-i mezbûre Şahhuban Hatun müteveffâ-yı mezbûrun cümle muhallefâtına vâzı‘ü’l-yed olmuşdur. Muhallefât-ı mezbûreden bi-hasebi’ş-şer‘i’ş-şerîf bana âid olan hisse-i şer‘iyemi ve mehr-i müeccelimi taleb ederin suâl olunsun dedikde gıbbe’s-suâl mezbûr Bali Çelebi merkūme Fatıma Hatun müteveffâ-yı mezbûr Mehmed Çelebi’nin menkûhası olduğu ma‘lûmum değildir dedikde mezbûre Fatıma’dan sıdk-ı makāline mutâbık beyyine taleb olundukda mahalle-i mezbûrede hâlâ imâm olan Mevlana Ebûbekir b. Bali mahfil-i kazâya hâzır olup gıbbe’l-istişhâd fi’l-vâki‘ mezbûre Fatıma bt. Hüseyin merhûm Mehmed Çelebi b. Kurd’a beş bin akçe mehr-i müeccel ile bizim huzûrumuzda akd-i nikâh olundu bu husûsa ben şâhidim deyip ve Mimarbaşı mahallesinde müezzin olan Mahmud b. Mehmed dahi mezbûr Mehmed Çelebi b. Kurd mezbûre Fatıma bt. Hüseyin’i beş bin akçe mehr-i müeccel üzere tezevvüc eyledim deyü ikrâr-ı tav‘î eyledi vech-i meşrûh üzere ikrârına ben şâhidim şehâdet-i şer‘iye ederin dedikde vekîl-i mezbûr Bali Çelebi fi’l-vâki‘ mezbûre Fatıma bt. Hüseyin’i talâk-ı selâse ile tatlîk edip nice kimesneleri işhâd dahi etdi deyip beyyine taleb olundukda mahalle-i mezbûreden el-Hâc Ali b. İlyas ve Derviş b. Abdullah ve Ali b. Abdullah ve Hüseyin b. Mehmed ve Mahmud b. Cafer mahfil-i kazâya hâzırûn <> fi’l-hakīka müteveffâ-yı mezbûr Mehmed Çelebi b. Kurd Yanova seferine müteveccih oldukda zevcem olan Fatıma bt. Hüseyin’i talâk-ı selâse ile tatlîk eyledim deyü bizi işhâd eyledi. Bu husûsa biz şâhidleriz şehâdet-i şer‘iye dahi ederiz deyü edâ-i şehâdet-i şer‘iye etdiklerinde gıbbe’t-ta‘dîl şehâdetleri hayyiz-i kabûlde vâki‘ olup mûcebiyle hükmolundukdan sonra mâ-vaka‘a bi’t-taleb kayd-şüd. Fî 25 Cemâziyelâhir li-sene 1005. Şühûdü’l-hâl: Mustafa b. İsa, Bali Bey, Ahmed b. ( ), İbrahim [b.] Hüseyin, Mehmed, Mehmed [b.] Ramazan.