İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 353 Hüküm no: 427 Orijinal metin no: [82b-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şehit olan Musa Çavuş’un kızlarına vasi tayini Mahmiye-i Kostantıniyye’de vâki‘ merhûm Mehmed Ağa câmi‘inde noktacı olan Mahmud Çelebi b. Abdülbeşir ve yine mahmiye-i mezbûrede vâki‘, kiliseden câmi‘e münkalib Fetih câmi‘inde noktacı olan Muharrem Halîfe b. İskender meclis-i şer‘a hâzırân olup mahmiye-i mezkûre mahallâtından Cebeci mahallesinde sâkin iken bundan akdem Rumeli-i ma‘mûrede vâki‘ Eğri kal‘ası tahtında şehîden vefât eden merhûm Musa Çavuş b. Ömer’in İsmi ve Saime nâm sagīreteynine kıbel-i şer‘den mansûb vasî olan Mustafa b. Mahmud mahzarında, hâmil-i hâze’l-kitâb fahrü’l-a‘yân Derviş Çelebi b. Ahmed nâm kimseden sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, müteveffâ-yı mezbûr Musa Çavuş dünyânın fâni, âhiretin bâkī olduğunu idrâk ettiğinde şehîd olacağı sefer-i sultânîye hurûc gününde bizim yanımızda müdde‘î-yi mezbûru sagīreteyn-i mezbûreteyninin tesviye-i umûruna vasîyy-i muhtâr ve nefsine nâib-i menâb kıldı. Mezbûr Derviş Çavuş dahi vesâyet-i merkūmeyi kabûl edip hizmet-i lâzımesini edâya müte‘ahhid oldu. Şehâdeten sahîhaten şer‘iyeten makbûleten ba‘de ca‘li şerâiti’l-kabûl mer‘iyeten şehâdetleri mûcebince hükmedildi. Cerâ zâlike ve hurrire fi’l-yevmi’l-âşir min-Cumâdelûlâ li-sene hamse ve elf. Şühûdü’l-hâl: Yusuf b. Abdüllatif, Ahmed b. Ali, Ömer Efendi b. Şehabeddin, Mustafa Çavuş b. Mehmed, Hafız Mehmed Ağa b. Şeyhi, Mehmed Subaşı b. Musa, Yusuf Çavuş b. İbrahim, Mehmed b. Abdullah, el-muhzırûn