İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 355 Hüküm no: 431 Orijinal metin no: [83a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sefer-i sultânîde vefat eden Kazgancılan Kethudası Mehmed’in terekesi İstanbul’da Hâssa Beytü’l-mâl Emîni olup sefer-i sultânîde vefât eden Kazganîler Kethudâsı Mehmed b. Abdullah’ın zevcesinden gayri zâhirde vârisi olmamağla mahâllinde vâzı‘ü’l-yed olan Mehmed Çavuş b. Abdullah meclis-i şer‘de Osman b. Abdullah mahzarında takrîr-i merâm edip müteveffâ-yı merkūmun evânî-i nühâsiye bahâsından mezbûr Osman zimmetinde olan dokuz bin akçeyi emânetim hasebiyle taleb ederim suâl olunsun dedikde gıbbe’s-suâl mezbûr Osman cevâbında fi’l-hakîka müteveffâ-yı merkūm dahi sefere müteveccih oldukda beynimizde ma‘lûm evânî-i nühâsiyeyi erbâb-ı hibre dokuz bin akçe takvîm edip sefer-i mezbûrdan gelirsem yine evânî-i mezbûreyi eğerçi kabûl edip vefât ederse semen-i merkūmu techîz ve tekfîne sarf eylemek üzere bana bey‘ edip bende dahi vech-i meşrûh üzere iştirâ etdim evânî-i merkūme dahi duruyor deyü ikrâr etmeğin kayd olundu. Fî 15 Zilka‘de sene 1005 Şühûdü’l-hâl: el-Hâzırûn