Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 511 Hüküm no: 613 Orijinal metin no: [105b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Ahmed’in üzerine oğlu Salih için nafaka takdiri Nafaka hüccetidir. Mahmiye-i İstanbul’da Hatice Sultan mahallesinde sâkine işbu bâ‘isetü hâze’l-kitâb Hatice bt. Mehmed nâm Hâtun meclis-i şer‘-i şerîfde zevc-i muhâlı‘ı Mehmed b. Ahmed mahzarında takrîr-i kelâm ve bast-ı merâm edip mezbûr Mehmed’in firâşından hâsıl ve benden mütevellid işbu sadrî sagīr oğlum Sâlih’in nafaka ve kisve-bahâ ve sâir levâzım-ı mühimmesiyçün babası mezbûr Mehmed’in üzerine kadr-i ma‘rûf nafaka farz ve takdîr olunmak matlûbumdur dedikde hâkim-i muvakki‘-i sadr-ı kitâb -tûbâ-lehû ve hüsnü me’âb- hazretleri dahi sagīr-i mezbûrun nafaka ve kisve-bahâ ve sâir levâzım-ı mühimmesiyçün babası mezbûr Mehmed’in rızâsıyla târih-i kitâbdan külle yevm dörder akçe nafaka farz ve takdîr edip meblağ-ı mefrûz-ı mezbûru sagīr-i mezbûrun nafaka ve kisve-bahâ ve eşyâ-i levâzım-ı mühimmesine harc ve sarfa ve lede’z-zarûre istidâneye ve inde’z-zafer babası mezbûr Mehmed üzerine rücû‘a mezbûre Hatice Hâtun’a izin vermeğin mâ hüve’l-vâki‘ bi’t-taleb ketb olundu. Fi’l-yevmi’s-sânî min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Mustafa Çelebi b. Ahmed, Mehmed Çelebi b. İdris, Ali Çelebi b. Bâkī, Hüseyin Çelebi b. Mehmed, Mehmed Çelebi b. Mehmed, Mahmud Çelebi b. Mehmed.