Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 511 Hüküm no: 612 Orijinal metin no: [105b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Halil Çelebi b. Seyyid Mehmed’in, Kanaki v. Mandelaki’den alacaklı olduğu Mahmiye-i İstanbul’da Müftü Ali Çelebi mahallesinde sâkin pazarcı tâifesinden bâ‘isü hâze’l-kitâb es-Seyyid Halil Çelebi b. es-Seyyid Mehmed nâm kimesne meclis-i şer‘-i şerîf-i enverde medîne-i Üsküdar’a tâbi‘ Maltepe nâm karyede sâkin hıyarcı tâifesinden Kanaki v. Mandelaki nâm zimmî mahzarında üzerine da‘vâ ve takrîr-i kelâm edip mezbûr Kanaki’ye târih-i kitâbdan bir sene mukaddem dokuz yüz doksan akçe edâ ve teslîm ol dahi ber vech-i muharrer istidâne ve kabz edip meblağ-ı mezbûrun dört bin üç yüz yetmiş dört akçesi mukābelesinde adedi beynimizde ma‘lûm hıyar verip beş bin altı yüz on altı akçe zimmetinde bâkī kalmağla suâl olunup alıverilmesi matlûbumdur dedikde gıbbe’s-suâl mezbûr Kanaki cevâbında fi’l-hakīka müdde‘î-i mezbûr es-Seyyid Halil Çelebi’ye ber vech-i muharrer cihet-i mezbûrdan bâkī beş bin altı yüz on altı akçe zimmetinde lâzımü’l-edâ deyni olduğu bi tav‘ihî ikrâr etmeğin alâ mûcebi ikrârihî meblağ-ı mezbûr beş bin altı yüz on altı akçeyi müdde‘î-i mezbûra edâya mezbûr Kanaki’ye tenbîh birle mâ vaka‘a bi’t-taleb ketb olundu. Fi’l-yevmi’l-hâmis min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Ali b. ( ), Mehmed b. İdris, Mehmed b. Hüseyin.