Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 513 Hüküm no: 615 Orijinal metin no: [106a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Defterdar Hasan Paşa’nın vârislerinin mülk odalar davasının padişah iznine havale olunması Min mümzâtihî Hasan Paşa odalarının hüccetidir. Mahmiye-i İstanbul’da Soğanağa mahallesinde sâkin ve Temeşvar vâlisi oldukdan sonra maktûlen fevt olan defterdâr Hasan Paşa’nın sagīr oğlu Mehmed’in ve sagīre kızı Fâtıma Hanım’ın tesviye-i emirleriyçün kıbel-i şer‘-i mergûbdan mansûb vasîleri olan İbrahim Efendi b. Yusuf saray-ı kāimmakām-ı hazret-i sadr-ı a‘zamîde ma‘kūd meclis-i şer‘-i şerîf-i âlîde müteveffâ-yı mezbûrun mahmiye-i mezbûrda Kırkçeşme kurbunda ve Kâtib Sinan mahallesinde vâki‘ iki müte’ehhilîn odaları sükkânı olan ashâbü hâze’l-vesîka Halil Efendi b. Mehmed ve Muharrem b. Ömer ve Ali b. Mustafa ve el-Hâc Musa b. Mustafa ve el-Hâc Ahmed b. Mehmed ve üstâd Ahmed b. Mustafa ve Hüseyin b. Ahmed ve [İ]brahim Çavuş b. Hüseyin ve üstâd Mehmed b. es-Selâm ve Çadırcı Mustafa Çelebi ve el-Hâc Hüseyin b. Ahmed ve Mehmed b. Ömer ve Mahmud b. Osman ve Yusuf b. Abdullah ve Pîrî b. Mustafa ile Rahime bt. Abdullah ve Ayşe ve Sitti bt. Mustafa nâm hâtunlar muvâcehelerinde da‘vâ ve takrîr-i kelâm edip mârrü’z-zikr odalar müteveffâ-yı mezbûr Hasan Paşa’nın mülkü olmağla mezbûr Hasan Paşa hâl-i hayâtında tevliyyet ve tasarrufunu kendi nefsine ba‘dehû, evlâdına ile’l-inkırâz meşrûta vakfı olup ba‘de vefâtihî tevliyyet ve tasarrufu sagīrân-ı mezbûrânın meşrûtaları iken mezbûrlar mârrü’z-zikr odaları bi’l-külliye zabt ve tasarruf eder suâl olunup anlardan kasr-ı yed ve bana vesâyetim hasebiyle teslîme mezbûrûna tenbîh olunması matlûbumdur dedikde gıbbe’s-suâl mezbûrûn cevâblarında fi’l-hakīka mârrü’z-zikr odalar müteveffâ-yı mezbûrun mülkü olup fevt oldukda cânib-i mîrîye olan düyûn-ı müsbetesiyçün ism-i mâl ıtlâk olunur eşyâsı bey‘ ve semenlerini kabz ve düyûnu için cânib-i mîrîye edâ etmek için ol târihde mahmiye-i mezbûrda Şıkk-ı evvel defterdârı vekîli bulunan Yeşilli Mehmed Efendi’ye hitâben hatt-ı şerîf-i hâkānî sâdır olmağla mûmâ-ileyh Mehmed Efendi dahi ber mûceb-i hatt-ı hümâyûn-ı meymenet-makrûn-ı sultânî mârrü’z-zikr odaları sûk-ı sultânîde müzâyede olunup semen-i misilleriyle her birimiz bey‘ ve teslîm biz dahi iştirâ ve teslîm-i semen etmekle bi’l-külliye zabt ve tasarruf ederiz deyicek fi’l-hakīka hâl bâlâda şerh ve beyân ve tafsîl ve ayân olunan minvâl üzre olduğu lede’ş-şer‘i’l-enver zâhir ve müte‘ayyin olmağın merkūm İbrahim Efendi’nin da‘vâsının istimâ‘ı izn-i sultânî sudûruna havâle olunup işbu vesîka bi’t-taleb ketb olundu. Fî evâili şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Mustafa Çelebi b. Ahmed, İbrahim Çelebi b. Ahmed, diğer Mustafa Çelebi b. Abdurrahman, Mehmed b. İdris.