İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 373 Hüküm no: 456 Orijinal metin no: [87b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Derviş Çavuş b. Abdullah’ın ölümü üzerine zimmetinde kalan para Dergâh-ı âlî çavuşlarından Halil Çavuş b. Abdullah’ın husûs-ı âtîye vekîl-i şer‘îsi olup mahmiye-i Kostantıniyye’de Sarı Timurtaş mahallesinde sâkin Derviş Çavuş b. Abdullah’ın sagīre kızları Rabia ve Emine’ye vasîyy-i şer‘î olan fahrü’l-akrân Mehmed Çavuş b. Halil mahzarında takrîr-i merâm edip müteveffâ-yı merkūm Rüstem Çavuş hâl-i hayatında ve kemâl-i akl ve sıhhatinde müvekkilim mezbûr Halil Çavuş’a bir tımar alıvermek için müvekkilim mâlından tammü’l-vezn kâmilü’l-ayâr altmış <> sikke-i hasene verdim husûs-ı merkūm husûle karîn olmamağın meblağ-ı mastûru müteveffâ-yı mezbûrun zimmetinde kaldı vekâletim hasebiyle meblağ-ı mezbûru muhallefât-ı müteveffâdan taleb ederin suâl olunsun dedikde gıbbe’s-suâl ve akībe’l-inkâr vekîl-i merkūmun sıdk-ı makāline beyyine taleb olundukda mahmiye-i mezbûrede << Gedikpaşa mahallesinde sâkin Cafer Çavuş b. Abdullah ve Osman b. İbrahim ez-za‘îm nâm kimesneler meclis-i şer‘a li ecli’ş-şehâde hâzırân olup fi’l-hakīka vekîl-i mezbûr Derviş Çavuş müvekkil-i mesfûr Halil Çavuş’a tımar alıvermek için müvekkil mâlından tammü’l-vezn kâmilü’l-ayâr altmış sikke-i haseneyi mezbûr Rüstem Çavuş hayatında ve kemâl-i akl ve sıhhatinde bizim huzûrumuzda teslîm etdikde ol dahi kabz ve tesellüm eyledi bu husûsa şâhidleriz şehâdet dahi ederiz deyü edâ-i şehâdet-i şer‘iye eylediklerinde ba‘de ri‘âyeti şerâiti’l-kabûl şehâdetleri makbûle olup ve şer‘an mürâ‘âtı lâzım olanlar ri‘âyet olunup mûcebiyle hükmolundukdan sonra vâki‘ hâl gıbbe’t-taleb ketb olunup yed-i tâlibe def‘ olundu. Fi’t-târihi’l-mezbûr. Şühûdü’l-hâl: Yahya Bey el-müteferrika, Muharrem b. Abdullah, Edhem Çavuş b. Gazanfer, Mustafa Çavuş b. Mehmed, Mehmed Çavuş b. Ali, Mehmed b. Ramazan.