İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 373 Hüküm no: 457 Orijinal metin no: [87b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bülûğ çağına erişen Mehmed ve Raziye’nin vasilerinden babalarının mirasını aldıkları Mahrûse-i İstanbul’da Kürkçübaşı mahallesinde vefât eden Hızır b. Abdullah nâm kassâm-ı sultânînin sulbî oğlu olan Mehmed nâm emred-i bâliğ ve sulbiye kızı olup sinni bulûğa mütehammil olduğu hâlde bulûğuna i‘tirâf eden Râziye meclis-i şer‘de vasîyy-i muhtârları olan hâmilü’l-kitâb Çadırcıbaşı Mahmud Bey b. Abdullah mahzarında takrîr-i merâm edip müteveffâ-yı merkūm babamızdan nukūddan bize intikāl edip sene selâse ve elf Rebî‘ülâhir’i evâili ile müverrah kassâm-ı askerî defterlerinde muharrer ve mastûr olan li’z-zekeri mislü hazzi’l-ünseyeyn on iki bin yedi yüz elli sekiz akçemizi vasîyy-i muhtârımız olan Çadırcıbaşı mezbûr Mahmud Bey b. Abdullah’dan bi’t-tamam ve’l-kemâl kabz etdik deyü ikrâr-ı şer‘î ve i‘tirâf-ı mer‘î etdiklerinde mukırrân-ı mezbûrân dahi vasîyy-i mezkûr Mahmud vicâhen ve şifâhen tasdîk etdikden sonra mâ-vaka‘a ketb olundu. 23 Cemâziyelâhir 1005. Şühûdü’l-hâl: Hacı Halil b. Süleyman el-müezzin, İvaz b. Mustafa, Mehmed b. Abdullah, Keyvan b. Abdullah, Mehmed Çavuş b. Hasan, Üstâd Ramazan b. Abdullah, Ramazan b. Abdullah.