İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 376 Hüküm no: 460 Orijinal metin no: [88b-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şehit olan Musa Çavuş’un borcu olduğu Mustafa Çavuş b. Mehmed ve Mustafa Bey b. Kasım ve Hüseyin Bey b. Hasan ve Mustafa b. Musa nâm kimseler meclis-i şer‘-i şerîfe hâzırûn olup Rumeli-i ma‘mûrede vâki‘ Eğri Kal‘ası tahtında bundan akdem şehîden vefât eden Musa Çavuş b. Ömer Reis’in Saime ve İsmi nâm sagīre kızlarının vasîyy-i muhtârı olan Derviş Çelebi Ahmed nâm hasm-ı münkir mahzarında ve müteveffâ-yı mezkûrun anası ve vârisi Âişe bt. Hasan mahzarında ve müteveffâ-yı mesfûrun babası ve vârisi Ömer Reis b. Hamza mahzarında fahrü’l-cüyûş Mustafa Çavuş b. Mehmed’den sâdır olan da‘vâ-yı sahîha-i şer‘iyede gıbbe’l-istişhâd şöyle şehâdet ettiler ki, müteveffâ-yı mezbûrun zimmetinde müdde‘î-yi merkūmun karz-ı şer‘î cihetinden râyicü’l-vakt yüz yirmi bin akçe hakkı vardır. Hakkını kısmen veyâ tamamen ahz ü kabz etmediğine, hâl-i hayatında hakkını başkasına havâle etmediğine, zimmetini bi-vechin mine’l-vücûhi şer‘iye ibrâ etmediğine dâir müdde‘î-yi merkūm tahlîf edilmeğin gıbbe ri‘âyeti şerâiti’l-kabûl şehâdetleri mûcebince meblağ-ı mezkûrun müteveffâ-yı mezbûrun muhallefâtından edâsına hükmedildi. Cerâ zâlike ve hurrire fî-evâili Recebi’l-mürecceb li-sene hamse ve elf. Şühûdü’l-hâl: Hasan Çelebi b. Ahmed, Ahmed b. Hüseyin, Hüseyi b. Abdullah, Ahmed b. Mehmed, Derviş b. Mahmud, Mehmed Çavuş b. Pîrî, Mehmed b. Hayreddin, Mehmed b. Ramazan