İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 379 Hüküm no: 464 Orijinal metin no: [89a-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terekesi Beytülmal tarafından zabtedilen Musa Çavuş’un evinin müzayede ile satıldığı Mahmiye-i Kostantıniyye mahallâtından Cebeci mahallesinde bundan akdem vefât eden Musa Çavuş b. İskender’in muhallefâtına vâzı‘-ı yed olan, mahmiye-i mezbûrede vâki‘ Beytü’l-mâl-i hâs emîni Mehmed Çavuş b. Abdullah meclis-i şer‘a hâzır olup müteveffâ-yı mezbûrun muhallefâtı dâhilindeki, mahalle-i mezbûrede kâin, dâhilî ve hâricî muhavvatalı, dâhiliyesi, aralarında sofa bulunan tahtânî iki hâneyi, müşterek anbarı müştemil, hâriciyesi altında oda bulunan selamlığı, ahırı, sofayı ve su kuyusunu müştemil bulunan, hudûdu bir tarafından Aynsima bt. Abdullah mülkü ve Hüma bt. Abdullah mülkü, bir tarafından Kamer bt. Abdullah mülkü, tarafeynden de tarîk-ı âm ile mahdûd bulunan cemî‘ menzili cümle tevâbi‘i ve levâhıkıyla râyicü’l-vakt elli bin akçe semen-i mu‘ayyen-i makbûzla Ferhad b. Abdullah’a îcâb kabûlü ve teslîm tesellümü hâvî bey‘-i bâtt-ı sahîh-i şer‘î ile bey‘ ettiğini ikrâr eyledi. Mezbûr Ferhad dahi iştirâ eyledi. Vâki‘ ikrâr müşterî-yi mezbûr tarafından vicâhen ve şifâhen tasdîk edildi. Mubâya‘a-i mezbûre menzil-i mesfûrun sûk-ı sultânîde ve mecma‘-ı nâs olan mahallerde tâlibîn ve râgıbîn beyninde kirâren müzâyede olunup ragabât-ı nâs bi’l-külliye münkatı‘a oldukdan sonra müşârün-ileyh Ferhad b. Abdullah üzerinde semen-i meblağ-ı merkūmda karâr edip ziyâde ile âhar tâlibi olmadığı ecilden vâki‘ oldu. Fî 17 Receb li-sene hamse ve elf. Şühûdü’l-hâl: Abdülgaffar b. Abdülcevad, Mustafa b. Sinan, Mustafa Çavuş b. Ahmed, Derviş b. Veli, Mustafa b. Abdullah, mahmud b. Budak, Hasan b. Ahmed, Ahmed b. Hüseyin, Derviş b. Ahmed, Osman b. Abdullah ve gayruhum