İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 378 Hüküm no: 463 Orijinal metin no: [89a-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seferde ölen Veli Bey’in evinin borcu nedeniyle satıldığı Mahmiye-i Kostantıniyye mahallâtından Kasab el-Hâc İvaz mahallesinde sâkin iken bundan akdem sefer-i sultânîde vefât eden Veli Bey’in Ali Bey nâm sagīr oğluna kıbel-i şer‘-i mergūbdan mansûb vasî olan Derviş Bey b. Karagöz ve müteveffâ-yı mezbûrun kebîr oğlu Mehmed b. Veli ve müteveffâ-yı mezkûrun zevcesi ve vârisi Âişe bt. Muslihiddin nâm hatun meclis-i şer‘-i şerîfe hâzırûn olup müteveffâ-yı mesfûrdan kendilerine irs-i şer‘î ile intikāl eden, mahalle-i mezbûrede vâki‘, aralarında sofa bulunan tahtânî iki hâneyi, ahırı, cüneyneyi, fırını ve kenîfi müştemil, hudûdu bir tarafından Mustafa b. Ahmed mülkü, bir tarafından Ali b. Süleyman mülkü, bir tarafından Rahime Hatun bt. İskender mülkü, bir tarafından tarîk-ı âm ile mahdûd bulunan cemî‘ menzili cümle tevâbi‘i ve levâhıkı ve kâffe-i menâfi‘i ve merâfıkı ile râyicü’l-vakt on bir bin beş yüz akçe semen-i mu‘ayyen-i makbûzla bâ‘is-i hâze’s-sicil Mustafa Bey b. Abdullah’a îcâb kabûlü ve teslîm tesellümü hâvî bey‘-i bâtt-ı sahîh-i şer‘î ile bey‘ ettiklerini ikrâr eylediler. Mezbûr Mustafa Bey dahi iştirâ eyledi. Vâki‘ ikrâr müşterî-yi mezbûr tarafından vicâhen ve şifâhen tasdîk edildi. İşbu mübâya‘a, müteveffâ-yı mezkûrun deyni sebebiyle vâki‘ oldu. Cerâ zâlike ve hurrire fî-evâsıtı Recebi’l-mürecceb li-sene hamse ve elf. Şühûdü’l-hâl: Ali b. Şahkulu el-imâm, Receb b. Abdullah, Ahmed Çelebi b. Mahmud, Rıdvan b. Abdullah, Yusuf Çelebi b. Mehmed, Şahkulu