İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 386 Hüküm no: 469 Orijinal metin no: [90b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yenibahçe bostanlarında vefat eden Ali’nin Beytülmala kalan mirası Mahrûse-i İstanbul’da vâki‘ Beytü’l-mâl-i hâssa bi’l-fi‘il emîn olduğu cihet ile yine mahrûse-i mezkûrede Yenibahçe’de olan bostanlarda merhûm Kıyâmî Efendi’ye intimâ ile ma‘rûf olan bostanda […] vefât eden Ali b. Abdullah’ın zâhirde vâris-i ma‘rûfu olmamağile muhallefâtına vâzı‘ü’l-yed olan fahrü’l-akrân Mehmed Çavuş b. Abdülmennan meclis-i şer‘de merhûm-ı mezbûrun sulbî oğlu olup sinni bulûğuna mütehammil olmadığı hâlde bulûğunu mu‘terif olup verâseti hasebiyle mülkiyet üzere bostan-ı mezkûra mutasarrıf olan Mustafa Çelebi mahzarından takrîr-i merâm edip işbu zeyl-i kitâbda esâmîleri mastûre olan Müslümânlar şehâdetleri ile sâir muhallefâtına emânetim hasebiyle vâzı‘ü’l-yed olduğum müteveffâ-yı mezbûr Ali b. Abdullah’ın işbu meclis-i şer‘de hâzırân olan Dimo v. Aleksi ve Dimo v. Niço nâm zimmîler ile ba‘de’l-istîcâr bostan-ı mezkûrda şirket üzere tohum alıp ekdikleri tohumdan hâsıl olan bukūl ve hadrevât müteveffâ-yı mezbûr ile zimmîyân-ı mezkûrânın olduğu sâbit ve muhakkık olup zikr olunan bukūl ve hazrevâtdan müteveffâ-yı mezkûrun hissesi tahmîn-i sahîh ile bin akçe tahmîn olunmağın müteveffâ-yı mezbûrun hissesi mukābelesinde Beytü’l-mâle enfa‘ olmağın tahmîn olunan bin akçe sâhib-i mülk olan Mustafa Çelebi yedinden Beytü’l-mâl-i mezbûr için emânetim hasebiyle alıp kabz eyledim. Hisse-i mezbûreye mezkûr Mustafa Çelebi mutasarrıf ola dedikde mâ-vaka‘a bi’t-taleb kayd-şüd. Fî-evâsıtı Receb li-sene hamse ve elf. Şühûdü’l-hâl: Üstâd Keyvan, Üstâd Hüseyin, Üstâd Behram, diğer Üstâd Hüseyin, Mehmed b. Ramazan, Mustafa b. Mahmud ve gayruhum.