İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 388 Hüküm no: 473 Orijinal metin no: [91a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hekimbaşı Hasan Çelebi’nin muhallefatının Beytülmala kalması gereken miktarına karısı Mümine’nin engel olması Mahrûse-i İstanbul’da Beytü’l-mâl-i hâssa bi’l-fi‘il emîn olan fahrü’l-cüyûş Mehmed Çavuş b. Abdülmennan meclis-i şer‘-i şerîfe gelip takrîr-i merâm edip mahrûse-i mezkûrede Saray-ı atik-i âmirede reis-i etibbâ olup Kirmasti nâm mahallede vefât eden merhûm Hasan Çelebi b. Hamza’nın zevcesi Mümine bt. Ataullah’dan gayri zâhirde vâris-i ma‘rûfu olmayıp muhallefâtının erbâ‘-ı selâsesi Beytü’l-mâl-i mezkûra âid olmağın işbu târih-i kitâb senesinde vâki‘ Rebî‘ülâhir’in onuncu günü muhallefâtı tahrîr ve kabza sâbıkā Beytü’l-mâl-i mezkûra emîn olan Mehmed Bey b. Abdullah mahalle-i merkūmede olan menziline varıp cümle muhallefâtına vâzı‘ü’l-yed olan mezbûre Mümine’den taleb ve suâl etdikde gâh müteveffânın nesnesi yokdur gâh üç buçuk aylık hamlim vardır deyü cevâb verip ve şirret ü şekā edip bir akçe ve bir habbe Beytü’l-mâl için kabz olunmadığından gayri menzil-i merkūmun kabzına dahi mâni‘a olmuş idi. Hâlâ geri menzil-i merkūmun üzerine varılıp muhallefât-ı müteveffâ her ne ise görülüp tahrîr olunmasını taleb ederin dedikde tekrar menzil-i merkūmun üzerine varılıp zeyl-i kitâbda esâmîsi mastûr olan Müslimîn mahzarında mezbûre Mümine’ye suâl olundukda üç buçuk aylık hamlim vardır deyü şirret ü şekā edip müteveffâ-yı merkūmun menzili bey‘a ve muhallefâtını kabza mâni‘a olup ve müteveffâ-yı mezbûrun vefâtından berü sekiz ay mikdârı zaman mürûr edip mezbûre Mümine’nin hamli zuhûr etmeyip mezbûre Mümine’nin etdiği vaz‘ mahz-ı şirret ve müzevverdir deyü sikāt ihbâr etmeğin vâki‘ hâl gıbbe’t-taleb ketb olundu. Fî-evâili Şa‘bân sene 1005. Şühûdü’l-hâl: Yusuf Çelebi b. Abdulkadir?, İbrahim b. Abdullah, Mehmed b. Ramazan, Mustafa b. Mahmud, Mirza b. Abdullah.