İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 389 Hüküm no: 474 Orijinal metin no: [91b-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun bt. Hüsrev’in evini istiğlal yoluyla sattığı Âişe Hatun bt. Hüsrev nâm zevcesi kıbelinden bey‘a, kabz-ı semene ve sonra istîcâra vekâleti Mehmed Halîfe b. İlyas el-müezzin ve Çadırcı Mehmed b. İlyas’ın şehâdeti ile bimâ hüve nehcü’s-sübût şer‘an sâbit olan Sarrâc-ı sultânî Ahmed Bey b. Mahmud meclis-i şer‘a hâzır olup müvekkile-i mezbûresinin işbu akdin kendilerinden sudûruna kadar mâliki olduğu ve taht-ı tasarrufunda bulundurduğu, mahmiye-i Kostantıniyye mahallâtından el-Hâc Muhyiddin mahallesinde kâin, dâhilî ve hâricî muhavvatalı, hâriciyesi, altlarında ahır bulunan üç fevkānî hâneyi müştemil, dâhiliyesi dört tahtânî hâneyi ve cüneyneyi müştemil bulunan, hudûdu bir tarafından Hasan Bey el-cündî mülkü, bir tarafından Zevvâk Mehmed Ağa mülkü, bir taraftan Halime Hatun mülkü, bir tarafından tarîk-ı âm ile mahdûd bulunan cemî‘ menzilini cümle hudûduyla râyicü’l-vakt elli bin akçe-i Osmânî semen-i mu‘ayyen-i makbûzla Eğre kal‘ası tahtında şehîden vefât eden merhûm Beşir? Ağa’nın Mustafa nâm sagīr oğlunun tesviye-i umûruna vasîyy-i muhtâr olan bâ‘isü’l-kitâb Süleyman Ağa b. Abdürreyyan’a îcâb kabûlü, teslîm tesellümü hâvî bey‘-i bâtt-ı sahîh-i şer‘î ile bey‘ ettiğini bi’l-vekâle ikrâr eyledi. Mezbûr Süleyman Ağa dahi sagīr-i merkūmun mâlıyla menzil-i mezkûru iştirâ etti. Ba‘de’t-tahliye ve’t-tekābuz bâyi‘-i mezkûrun istîcârı üzere müşterî-yi mezbûr menzil-i mesfûru zeyilde mezkûr târihden bir sene tamamına râyicü’l-vakt beş bin akçe ücret-i kirâ ile icâreye verdi. Vâki‘ ikrâr, vasîyy-i merkūm tarafından tasdîka vekâleti bimâ hüve tarîkü’s-sübût şer‘an sâbit olan Abdünnebi b. el-Hâc Turmuş tarafından bi’l-müvâcehe tasdîk edildi. Cerâ zâlike fi’r-râbi‘ ve’l-ışrîn min-şehri Recebi’l-mürecceb min-şühûri sene hamse ve elf. Şühûdü’l-hâl: Ahmed Efendi b. Alâaddin el-müderris, fahrü’l-mülâzımîn Yusuf Efendi, Mehmed b. Ramazan, Mustafa b. Mahmud, Ferhad b. Abdullah