İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 390 Hüküm no: 476 Orijinal metin no: [91b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eğri kalesinde vefat eden Yanıkkaş Mehmed Çavuş’un muhallefatı İşbu târih-i kitâbda fethi müyesser olan kal‘a-i Eğri altında şehîd olan merhûm Yanıkkaş el-Hâc Mehmed Çavuş b. İlyas’ın verâseti zevcesi fahrü’l-muhadderât Sâbiha Hatun bt. Mehmed Efendi’ye ve kebîr oğlu fahrü’l-cüyûş Ahmed Çavuş’a ve sagīre kızı Âişe’ye münhasıra olup sagīre-i merkūme Âişe’nin tesviye-i umûrıçün kıbel-i şer‘-i şerîfden mansûb vasîsi fahr-i erbâbi’t-tahrîr Hüsrev Bey b. Abdulkadir meclis-i şer‘-i şerîfde müteveffâ-yı merkūmun cümle muhallefâtına vâzı‘ü’l-yed olup yine kebîr oğlu ve verâseti olan mûmâ-ileyh Ahmed Çavuş mahzarında takrîr-i kelâm ve bast-ı merâm edip müteveffâ-yı merkūmun vilâyet-i Rumeli’nde ve mahmiye-i Kostantıniyye’de olan cümle emlâki ve esbâbı ve muhallefâtının bahâsından ba‘de’l-harc ve’l-mesârif muvakkı‘-i sadr-ı kitâb olan kassâm-ı askerî hazretlerinin imzâsı ve hâtemi ile mümzâ ve mahtûm defterinde mastûr olduğu üzere beyne’l-verese taksîm olunacak dört yüz seksen beş [bin] altı yüz bin akçe olup meblağ-ı merkūmdan vasîsi olduğum sagīre-i merkūme Âişe’nin hisse-i şer‘iyesi seksen dört bin dokuz yüz seksen akçe etmiş idi. El-hâletü hâzihî havâss-ı Kostantıniyye kazâsında Harâmîderesi kurbünde Terakadya nâm karyede vâki‘ ve yetmiş bin akçe ile mukavvem bir çardağı ve bir beyt-i süflîyi ve sofayı ve sundurmayı ve bir bahçeyi ve bir fırını ve bir matbahı ve bir ahırı ve bir yel değirmenini müştemil olup müteveffâ-yı merkūme intimâ ile ma‘rûf olmağile tahdîd ve tavsîfden müstağnî [92-a] (…) vesâir tevâbi‘ ve levâhıkı ile ve merâfık ve tarâyıkı ile ve karye mezbûre ortasında yine müteveffâ-yı merkūma intisâbla ma‘rûf olan lede’l-ahâli hudûdu ma‘lûme olan bir ev yeri ile sagīre-i merkūmeye nâfî‘ olup işbu zeyl-i kitâbda mastûrü’l-esâmî olan sikāt-i Müslimîn ve isbât-ı muvahhidîn-i nâfi‘iyyetîn inbâ ve ihbâr etmeğin vâzı‘ü’l-yed olan mûmâ-ileyh Ahmed Çavuş yedinden sagīre-i merkūme hissesi için vesâyetim hasebi ile alıp kabz etdim dedikde mâ-hüve’l-vâki‘ alâ-vukū‘ihi gıbbe’t-tasdîk ve ba‘de’t-taleb ketb ve tahrîr ve sebt ve tastîr olunup yed-i tâlibe def‘ olundu ki lede’l-hâce müzekkir mâ-cerâ ola. Tahrîren fi’l-yevmi’l-hâdi ve’l-ışrîn fî-şehri Receb li-sene hamse ve elf. Şühûdü’l-hâl: Kemal Efendi el-imâm, Mehmed b. İbrahim el-müezzin, Ali Bey b. ( )el-cündî, Murad b. ( ) er-râcil, Mehmed b. Abdullah er-râcil, Ali b. Abdullah, Veli b. İlyas, Rüstem b. Mustafa, Ali b. Abdullah, Hüseyin Bey b. Abdullah, Mehmed b. Ramazan, Ferhad b. Abdullah, Mehmed b. Hamza.