İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 394 Hüküm no: 483 Orijinal metin no: [93a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hatun’un malının üçte birini vakfettiği Mahrûse-i İstanbul’da Kiçi Hatun mahallesinde müteveffât olan merhûme Âişe Hatun bt. Uzun Şücâ‘‘ın vefâtından sonra vesâyâ-yı şer‘iyesini tenfîze vasîyy-i muhtârı olup hasm-ı şer‘î mahzarında ale’n-nehci’ş-şer‘î vesâyet-i mahkiyesini isbât eden es-Seyyid Mehmed b. es-Seyyid Mustafa meclis-i şer‘-i şerîfde müteveffât-ı merkūmenin sulbî sagīr oğlu Mehmed’in tesviye-i umûru için kıbel-i şer‘-i şerîfden mansûb vasîsi olup yine babası ve müteveffât-ı merkūmenin zevc-i mutallıkı olan fahrü’l-akrân Mehmed Bey b. Abdülmennan nâm sarrâc-ı sultânî mahzarında ikrâr-ı tav‘î edip müteveffât-ı merkūme sülüs mâlından iki cüz’-i şerîf için altı bin akçe ve Sultan Bâyezid-i cedîd mahallesinin avârızı için üç bin akçe ve ba‘de’l-vefât eyyâm-ı mu‘tâdede it‘âm-ı fukarâ ve mesâkîn için on bin akçe ve benim için ancak bin akçeyi îsâ-i şer‘î ile îsâ ve ta‘yîn edip ben vech-i meşrûh üzere îsâ ve ta‘yîn etdikde hasm-ı şer‘î olan mezbûr Mehmed Bey b. Abdülmennan mahzarında ale’n-nehci’ş-şer‘î isbât eylemiş idim ve hükm-i şer‘î dahi sıhhatine lühûk bulmuş idi. El-hâletü hâzihî iki cüz’ için ta‘yîn olunan altı bin akçeyi ve avârız-ı mahalle-i merkūme için ta‘yîn olunan üç bin akçeyi ve it‘âm-ı fukarâ için ta‘yîn olunan on bin akçeyi ve bana ta‘yîn olunan bin akçeyi cem‘an yirmi bin akçeyi muhallefât-ı müteveffât-ı merkūmeden vasîyy-i merkūm Mehmed Bey yedinden vesâyet-i meşrûham hasebiyle bi’t-tamam ve’l-kemâl alıp kabz etdim ve mezbûr Mehmed Bey b. Abdülmennan kendi mâlından bana hibe ve temlik etdiği bin akçeyi dahi mezbûr yedinden kabz ve ittihâb eyledim dedikde mâ-vaka‘a gıbbe’t-tasdîk ve ba‘de’t-taleb ketb olundu. Tahrîren fî- evâili Şa‘bân li-sene hamse ve elf. Şühûdü’l-hâl: el-Hâc Mehmed b. Ramazan, İsmail b. ( ), el-Hâc Hızır b. Ahmed, Pervîz b, Abdullah, el-Hâc Piyale b. Abdullah, Hamza b. Abdullah.