İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 393 Hüküm no: 482 Orijinal metin no: [92b-4, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terekesi Beytülmal tarafından zabtedilen Behram Ağa’nın evinin müzayede ile satıldığı Bundan akdem sefer-i sultânîde vefât eden merhûm Zevvâk Behram Ağa b. Abdullah’ın muhallefâtına vâzı‘-ı yed olan, mahmiye-i Kostantıniyye’de vâki‘ Beytü’l-mâl-i hâs emîni Mehmed Çavuş b. Abdulmuin meclis-i şer‘a hâzır olup, müteveffâ-yı mezbûrun muhallefâtı dâhilindeki, mahmiye-i merkūme mahallâtından Sarrâc İshak mahallesinde kâin, dâhilî ve hâricî muhavvatalı, dâhiliyesi, fevkānî iki hâneyi, sofayı ve kenîfi hâvî, hâriciyesi, üç fevkānî hâneyi, şehnişîni, anbarı, ahırı, su kuyusunu ve kenîfi müştemil bulunan, hudûdu bir tarafından Mehmed Bey mülkü, bir tarafından mezbûr Sarrâc İshak Vakfı, tarafeynden tarîk-ı âm ve tarîk-ı hâs ile mahdûd olan ve hâlen otuz üç bin akçe hakkı mukābelesinde hâzır bi’l-meclis Yusuf b. Abdullah el-Mısrî nâm kimse yedinde bulunan cemî‘ menzili cümle tevâbi‘i ve levâhıkıyla hâfızatü hâze’l-kitâb İsmihan bt. Murad’a îcâb kabûlü, teslîm tesellümü hâvî bey‘-i bâtt-ı sahîh-i şer‘î ile emânet-i mahkiyesi hasebiyle râyicü’l-vakt kırk üç bin akçe semen-i mu‘ayyen-i makbûzla bey‘ ettiğini ikrâr eyledi. Mezbûre İsmihan dahi kendi mâlı ile ve li-nefsihâ iştirâ eyledi. Vâki‘ ikrâr müşteriyye-i mezbûre tarafından vicâhen ve şifâhen tasdîk edildi. Mubâya‘a-i mezbûre menzil-i mesfûrun sûk-ı sultânîde ve mecma‘-ı nâs olan mahallerde tâlibîn ve râgıbîn beyninde kirâren müzâyede olunup ragabât-ı nâs bi’l-külliye münkatı‘a oldukdan sonra müşârün-ileyhâ İsmihan Hatun üzerinde semen-i meblağ-ı merkūmda karâr edip ziyâde ile âhar tâlibi olmadığı ecilden vâki‘ oldu. Cerâ zâlike ve hurrire fî-hâmisi Şa‘bân li-sene hamse ve elf. Şühûdü’l-hâl: İbrahim Halîfe el-imâm, el-Hâc Pîr Ahmed el-müezzin, el-Hâc Behram? el-kayyım, Halil b. Yusuf, Mustafa b. Abdullah, Hasan b. Abdullah