İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 396 Hüküm no: 487 Orijinal metin no: [93b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Na’lband Hüseyin’in çocuklarına kalan ev ile ilgili davada satışın sahih olmadığı Âlime Hatun bt. Hüseyin tarafından husûs-ı âti’z-zikre ale’n-nehci’ş-şer‘î vekâleti sâbite olan zevci Hüseyin Bey b. Abdullah mahfil-i kazâda bi’l-fi‘il Hâssa Topçular Kethudâsı olan Osman Kethudâ b. Nasuh mahzarında takrîr-i merâm edip bundan esbak vefât eden Na’lband Hüseyin b. Mehmed’in sulbiye sagīre kızları Fatıma ve Emine’nin tesviye-i umûru için vasîyy-i şer‘î iken vefât eden Mehmed Çavuş b. Abdülmennan’dan sagīretân-ı mezbûretâna babalarından irs-i şer‘î ile intikāl edip mahrûse-i İstanbul’da Kazasker merhûm câmi‘-i kurbünde Sarı Nasuh mahallesinde vâki‘ müvekkilem mezbûre kendi nefsi için iştirâ etdiği lede’l-ahâli ma‘lûmü’l-hudûd ve müştemilât olan mülk menzili mezbûr Osman Kethudâ’nın vekîli olan Abdünnebi b. Kasım’a altmış bir bin akçeye bey‘ edip meblağ-ı mezbûr altmış bir bin akçenin beş bin akçesini müvekkilem mezbûre Âlime Hatun kabz ve tesellüm edip elli altı bin akçesi kalmışdır. Bâkī kalan elli altı bin akçeyi müvekkilem için taleb ederim suâl <> olunsun dedikde gıbbe’s-suâl mezbûr Osman Kethudâ fi’l-hakīka tarafımdan mezbûr Abdünnebi’yi menzil-i mezkûru ancak altmış bin akçeye iştirâya vekîl etmiş iken mezkûr bin akçe ziyâde ile aldığından gayri müvekkile-i mezbûre Âlime Hatun vasîyy-i mezkûrdan iştirâ etdikden sonra geri vasîyy-i mezbûre yirmi sekiz bin yüz seksen iki akçeye istiğlâl tarîki üzere bey‘ ve meblağ-ı mezbûru tesellüm etdikden sonra sene selâse ve elf Ramazan’ının evâhirinde bir sene tamamına dek iki bin sekiz yüz on sekiz akçe ücret ile istîcâr etmiş iken [94a] (…) suâl olunsun dedikde mezbûre mahfil-i kazâya ihzâr olunup suâl olundukda fi’l-vâki‘ (…) mezbûru vasîyy-i mezbûrdan kendi nefsim için iştirâ eyledikden sonra geri vasîyy-i mezbûra yirmi sekiz bin yüz seksen iki akçeye istiğlâl tarîki üzere bey‘ ve meblağ-ı mezbûru tesellüm etdikden sonra <> sene selâse ve elf <> evâhirinde bir sene tamamına değin iki bin sekiz yüz on sekiz akçe ücret ile istîcâr eyledikden sonra menzil-i mezbûru vekîl-i mezbûre altmış bir bin akçeye bey‘ edip beş bin akçesini kabz etdim deyü cevâb verip menzil-i merkūmu müstecire iken bey‘ eylediğine mu‘terife olıcak vech-i meşrûh üzere olan bey‘ sahîh olmamağın aldığı beş bin akçenin geri Osman Kethudâ’ya edâsına tenbîh olunup mâ-vaka‘a gıbbe’t-taleb kayd-şüd. Fî- evâhiri Şa‘bân li- sene hamse ve elf. Şühûdü’l-hâl: Osman Bey serbölük, Abdi Bey b. Mustafa, Ahmed b. Mustafa el-cündî, Mahmud [b.] Ahmed, Ahmed Bey b. Mustafa, Abdi b. Kasım, Hasan b. ( ), Mehmed, İbrahim b. Mustafa ve gayruhum.