İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 397 Hüküm no: 488 Orijinal metin no: [94a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Memi Ağa tarafından bir tımar ferâğı için verilen paranın şehit olan Hemdem Kethuda’da kaldığı İftihârü’l-a‘yân Memi Ağa b. Abdullah tarafından husûs-ı âti’z-zikre vekîl olup vekâleti hasm-ı şer‘î mahzarında alâ-mâ hüve nehcü’s-sübût şer‘an sâbite olan Bâyezid b. Mehmed nâm kimesnenin mahfil-i kazâya hâzır olup bundan akdem sefer-i hümâyûnda vefât eden merhûm Hemdem Kethudâ b. Abdülmennan’nın kebîr oğlu ve vârisi ve sagīr kızı Saliha’ya kıbel-i şer‘-i şerîfden vasî nasb olunan aynü’l-a‘yân Ahmed Çelebi muvâcehesinde takrîr-i merâm edip müvekkilim mezbûr Memi Ağa müteveffâ-yı mezbûr Hemdem Kethudâ’ya bir tımar ferâğı için doksan bin fıddî akçe verip ol dahi meblağ-ı merkūmu ahz ü kabz eyledi. Tımar-ı mezbûru fâriğ olmadın vefât eyledi. Hâlâ <> meblağ-ı mezkûru vekâletim hasebiyle taleb ederim suâl olunsun dedikde gıbbe’s-suâl ve akībe’l-inkâr udûl-i Müslimînden Musa Çavuş b. Abdullah ve Ali Çavuş b. Abdullah nâm kimesneler li ecli’ş-şehâde meclis-i şer‘-i şerîfe hâzırân olup fi’l-vâki‘ müvekkil-i mezbûr Memi Ağa müteveffâ-yı [mezbûr] Hemdem Kethudâ’ya tımar ferâğı için doksan [bin] fıddî akçe verip ol dahi meblağ-ı merkūmu ahz ü kabz eyledi, tımarı mezbûru fâriğ olmadın vefât eyledi bu husûsa şâhidiz şehâdet dahi ederiz dediklerinde gıbbe ri‘âyeti şerâiti’l-kabûl şehâdetleri hayyiz-i kabûlde vâki‘ olup mûcebiyle hükmolundukdan sonra mâ-vaka‘a kayd olundu. Tahrîren fî- evâsıtı Recebi’l-mürecceb li- sene hamse ve elf. Şühûdü’l-hâl: Rıdvan Çavuş b. Abdülmennan, Mehmed b. Ramazan, Mustafa b. Mahmud, Mahmud b. Abdullah.