İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 398 Hüküm no: 492 Orijinal metin no: [94b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanova seferinde şehit olan Hüseyin Çelebi’nin vârislerine kalan ve Eğrikapı dışında olan çayırının satılması Mahmiye-i İstanbul’da Eminbey mahallesinde sâkin iken bundan akdem Yanova seferinde şehîd olan Hüseyin Çelebi b. Mustafa’nın verâseti li- ebeveyn karındaşı kıdvetü’l-emâsil ve’l-a‘yân Mahmud Efendi b. Mustafa’ya ve zevcesi kamer Hatun bt. Hasan Kethudâ’ya ve sulbiye kızı olup sinni bulûğa mütehammil olduğu hâlde bulûğunu mu‘terife olan Saliha’ya münhasıra olup mûmâ-ileyh Mahmud Efendi b. Mustafa meclis-i şer‘-i şerîfde bâ‘iset-i tahrîr-i kitâb merkūme Saliha bt. el-merhûm Hüseyin Çelebi tarafından husûs-ı âti’z-zikre vekîl olup hasm-ı şer‘î mahzarında bi- mâ- hüve nehcü’s-sübût şer‘an vekâleti sâbite olan fahrü’l-akrân Mehmed Çelebi b. Seydi Ali mahzarında bi’t-tav‘ ve’r-rızâ ikrâr ve i‘tirâf edip müteveffâ-yı mezbûr Hüseyin Çelebi’nin mahmiye-i mezbûre ebvâbından Eğrikapı hâricinde vâki‘ lede’l-ahâli ve’l-cîrân ma‘lûmetü’l-hudûd olan çayırı mirâren ve kirâren mecâlis-i tâlibîn ve râgıbîne arz olundukda ragabât-ı nâs münkatı‘a oldukdan sonra müvekkile-i mezbûre Saliha üzerinde kırk beş bin akçede karâr edip meblağ-ı mezbûrdan sekiz sehmden üç sehm benim hisse-i şer‘iyem on altı bin sekiz yüz yetmiş beş akçe edip meblağ-ı mesfûr on altı bin sekiz yüz yetmiş akçeyi bi’t-tamam ve’l-kemâl vekîl-i mezbûr Mehmed Çelebi yedinden alıp kabz edip sâlifü’z-zikr çayırda olan üç sehm hisse-i şer‘iyemi mezbûre Saliha’ya bey‘-i bâtt-ı sahîh-i şer‘î ile bey‘ ve teslîm eyledim dedikde mukırr-ı mûmâ-ileyhi ikrâr-ı meşrûhunda vekîl-i mezbûr Mehmed Çelebi vekâleti hasebi ile vicâhen tasdîk ve şifâhen tahkīk edicek mâ-vaka‘a bi’t-taleb ketb olundu. Tahrîren fî-evâsıtı şehr-i Recebi’l-mürecceb li-sene hamse ve elf. Şühûdü’l-hâl: Bali Çavuş b. Kasım, İbrahim Çavuş b. Bali Çavuş, Salih Çavuş b. Bali Çavuş, Mustafa b. Mahmud, Cafer b. Abdullah el-münâdî, Yusuf Çavuş b. Davud.