İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 399 Hüküm no: 493 Orijinal metin no: [94b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yanova seferinde şehit olan Hüseyin Çelebi’nin vârislerinden Mahmud Efendi’nin kendi hissesini aldığı Mahmiye-i İstanbul’da Eminbey mahallesinde sâkin iken bundan akdem Yanova seferinde şehîd olan merhûm Hüseyin Çelebi b. Mustafa’nın verâseti li-ebeveyn karındaşı kıdvetü’l-emâsil ve’l-a‘yân Mahmud Efendi b. Mustafa’ya ve zevcesi kamer Hatun bt. Hasan Kethudâ’ya ve sinni bulûğa mütehammil olduğu hâlde bulûğunu mu‘terife olan sulbiye kızı Saliha’ya münhasıra olup mûmâ-ileyh Mahmud Efendi b. Mustafa meclis-i şer‘-i şerîf-i nebevîde bâ‘isetü’l-kitâb mezbûretân Kamer Hatun ve Saliha taraflarından husûs-ı âti’z-zikre vekîl olup hasm-ı şer‘î mahzarında bimâ hüve nehcü’s-sübût şer‘an vekâleti sâbite olan fahrü’l-akrân Mehmed Çelebi b. Seydi Ali mahzarında bi’t-tav‘ ve’r-rızâ ikrâr ve i‘tirâf edip mûrisim müteveffâ-yı mezbûr Hüseyin Çelebi’nin cümle-i muhallefâtından sekiz sehmden üç sehm hisse-i şer‘iyem ki cem‘an yüz altmış beş bin <> on üç [akçe] olur meblağ-ı mezbûr yüz altmış beş bin on üç akçeden yüz altmış bin akçe alıp kabz eyledim bâkī beş bin on üç akçeden ferâgat edip min-ba‘d müteveffâ-yı mezbûrun nukūd ve akārından kat‘a alâkam kalmadı. Muhallefât-ı müteveffâ-yı mezbûra müte‘allik de‘âvî ve husûmâtdan (…) merkūmân Kamer Hatun ve Saliha’nın zimmetlerini ibrâ-i âm ve iskāt-ı tam ile ibrâ ve iskāt eyledim dedikde mukırr-ı mûmâ-ileyhi vekîl-i mezbûru tasdîkden sonra mâ-vaka‘a bi’t-taleb kayd olundu. Tahrîren fî (…)