İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 403 Hüküm no: 501 Orijinal metin no: [96a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haçova savaşında şehit olan Nasuh Bey’in mirasından kardeşi oğlunun hissesini talep ettiği (…) b. Nasuh Bey tarafından husûs-ı âti’z-zikre vekîl olup hasm-ı şer‘î mahzarında bimâ hüve nehcü’s-sübût şer‘an vekâleti sâbite olan el-Hâc Nebi b. Abdullah mahzarından takrîr-i da‘vâ edip işbu târih-i kitâbda vâki‘ olan sefer-i hümâyûnda Tabur muhârebesinde şehîd olan merhûm Nasuh Bey b. Abdullah’ın ben li-ebeveyn karındaşı oğlu ve vârisiyim muhallefâtına mezbûre Şahhuban vâzı‘atü’l-yed olmuşdur. Muhallefâtından bi-hasebi’ş-şer‘-i şerîf bana âid olan hisse-i şer‘iyemi taleb ederim dedikde gıbbe’s-suâl ve vekîl-i mezbûr müdde‘î-yi mezkûr Nasuh Bey’in karındaşı oğlu olduğunu mu‘terif olup lâkin mezkûr Nasuh Bey şehîd olduğu ma‘lûmum değildir dedikde müdde‘î-yi mezbûrun sıdk-ı makāline beyyine taleb olundukda <> udûl-i Müslimînden livâ-i Niğbolu tevâbi‘inden Servi nâm kasabadan Dergâh-ı âlî yeniçerilerinden Yayabaşılar’da yirmi birinci bölükden Hasan b. Abdullah ve yine kasaba-i mezbûreden Hâssa Cebeciler’den İbrahim b. Yardım mahfil-i kazâya li-ecli’ş-şehâde hâzırân olup istişhâd olundukda fi’l-vâki‘ mezbûr Nasuh Bey b. Abdullah işbu târih-i kitâbda vâki‘ sefer-i hümâyûnda Tabur muhârebesinde bizim huzûrumuzda şehîd oldu biz defneyledik bu husûsa şâhidleriz şehâdet dahi ederiz dediklerinde gıbbe’t-tasdîk bi’t-taleb kayd-şüd. Fî 3 Şa‘bân li-sene 1005. Şühûdü’l-hâl: el-Hâc Mehmed, Mustafa b. Mahmud, Mehmed b. Ramazan, Mehmed b. Hamza, Ferhad ve gayruhum.