İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 404 Hüküm no: 503 Orijinal metin no: [96a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdulfettah ile Ayşe’nin boşanarak birbirinin zimmetlerini ibra eyledikleri Mahmiye-i İstanbul’da Harrât Kemal mahallesinde sâkin Abdulfettah Çelebi b. Süleyman tarafından husûs-ı âti’z-zikre vekîl olup hasm-ı şer‘î mahzarında Ahmed b. Ali ve Mehmed b. Ahmed şehâdetleri ile vekâleti sâbite olan Ramazan Çelebi b. Ali mahfil-i kazâda müvekkil-i mezbûrun zevcesi Âişe bt. Mustafa Çelebi b. İbrahim tarafından husûs-ı âti’z-zikre vekîl-i şer‘î olan babası mezbûr Mustafa Çelebi mahzarında <> ikrâr ve i‘tirâf edip vekîl-i mezbûr Mustafa Çelebi ile vekâleti hasebiyle müvekkilim mezbûr Abdulfettah’ın zevcesi mezbûre Âişe’nin yirmi beş bin akçe mehr-i müeccelinden mezbûre Âişe’ye on bin akçeyi teslîm etdikden sonra bâkī on beş bin akçe mehr-i müecceli ve nafaka-i iddeti üzerine muhâla‘a edip cemî‘ zevciyete müte‘allik de‘âvîden ve zevcesi mezbûre Âişe ile müvekkilim mezkûr beyninde ilm-i şer‘î ile ma‘lûm bir câriye <> da‘vâsından mezbûre Âişe[‘nin] Mehmed Çelebi vakfından kendi nafakası için kabz ve sarf etdiği sekiz bin akçe da‘vâsından mezkûre Âişe’nin zimmetini ibrâ-i âm ve iskāt-ı tam ile ibrâ ve iskāt eyledim dedikde vekîl-i mezbûr Mustafa Çelebi dahi vekâleti hasebiyle hul‘-ı mezbûru kabûl ve vech-i meşrûh üzere merkūm Abdulfettah Çelebi’nin zimmetini ibrâ ve iskāt eyledim deyü ikrâr ve i‘tirâf etdikde gıbbe’t-tasdîk kayd-şüd. Şühûdü’l-hâl: (…) el-Hâc Veli (…), Mehmed Çelebi b. İbrahim, Ahmed b. Ali, Mustafa Çavuş b. Ahmed ve gayruhum.