İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 405 Hüküm no: 504 Orijinal metin no: [96b-1, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muhallefatı Beytülmal tarafından zabtedilen Kamer Hatun’un evinin müzayede ile satıldığı Mahmiye-i Kostantıniyye mahallâtından Mimâr Hayreddin mahallesinde bundan akdem vefât eden merhûme Kamer Hatun bt. Abdullah’ın muhallefâtına vâzı‘-ı yed olan, mahmiye-i mezbûrede vâki‘ Beytü’l-mâl-i hâssın emîni Mehmed Çavuş b. Abdulmuin meclis-i şer‘a hâzır olup müteveffât-ı mezbûrenin muhallefâtı dâhilindeki, mahalle-i mesfûrede kâin, tahtânî bir hâneyi, odayı, su kuyusunu ve arz-ı hâliyeyi müştemil, hudûdu, bir tarafından Muslu b. Yahya el-imâm mülkü, tarafeynden tarîk-ı âm, bir tarafından da tarîk-ı hâs ile mahdûd bulunan cemî‘ menzili cümle hudûdu ve kâffe-i hukūku ile îcâb kabûlü ve teslîm tesellümü hâvî bey‘-i bâtt-ı sahîh-i şer‘î ile râyicü’l-vakt yetmiş altı bin akçe-i Osmânî semen-i mu‘ayyen-i makbûzla bâ‘isü’l-kitâb Ahmed Çavuş b. Mehmed Çavuş’a bey‘ ettiğini ikrâr eyledi. Mezbûr Ahmed Çavuş dahi menzil-i mezkûru kendi mâlıyla li-nefsihî iştirâ eyledi. Vâki‘ ikrâr müşterî-yi merkūm tarafından vicâhen tasdîk edildi. Mubâya‘a-i mezbûre menzil-i mesfûrun sûk-ı sultânîde ve mecma‘-ı nâs olan mahallerde tâlibîn ve râgıbîn beyninde kirâren müzâyede olunup ragabât-ı nâs bi’l-külliye münkatı‘a oldukdan sonra müşârün-ileyh üzerinde semen-i meblağ-ı merkūmda karâr edip ziyâde ile âhar tâlibi olmadığı ecilden vâki‘ oldu. Fî-evâili şehri Şa‘bân li-sene hamse ve elf. Şühûdü’l-hâl: Sefer Çelebi b. Ramazan, Ali Çelebi b. el-Hâc Ahmed, (…) Çavuş b. Mustafa, Mustafa Çelebi b. el-Hâc Kasım, Yusuf b. Abdullah