İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 405 Hüküm no: 505 Orijinal metin no: [96b-2, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Muhallefatı Beytülmal tarafından zabtedilen Âlime Hatun bt. Abdullah’ın evinin müzayede ile satıldığı Mahmiye-i Kostantıniyye mahallâtından Sancakdâr Hayreddin mahallesinde sâkine iken bundan akdem Rumeli-i ma‘mûrede vâki‘ Yenişehir beldesinde vefât eden merhûme Âlime Hatun bt. Abdullah’ın muhallefâtına vâzı‘-ı yed olan, mahmiye-i mezbûrede vâki‘ Beytü’l-mâl-i hâssın emîni Mehmed Çavuş b. Abdulmuin meclis-i şera hâzır olup, müteveffât-ı mezbûrenin muhallefâtı dâhilindeki, mahalle-i mezbûrede kâin, fevkānî iki hâneyi, sofayı, tahtapûşu, su kuyusunu, kenîfi, ahırı, bağ ve eşcâr-ı müsmireli muhavvatayı, altında Hadice Hatun mülküne vâsıl, uzunu bennâ zirâ‘ıyla üç zirâ‘, arzı yirmi üç zirâ‘ tarîk bulunan odayı müştemil, hudûdu bir tarafından mezbûre Hadice Hatun mülkü, bir tarafından Mehmed b. Ahmed mülkü, bir tarafından tarîk-ı hâs, bir tarafından da Âişe Hatun Vakfı’yla mahdûd bulunan cemî‘ menzili, tarîk-ı mezbûr hâric olmak üzere cümle hudûdu ve kâffe-i hukūku ile îcâb kabûlü ve teslîm tesellümü hâvî bey‘-i bâtt-ı sahîh-i şer‘î ile râyicü’l-vakt yirmi bin akçe-i Osmânî semen-i mu‘ayyen-i makbûzla bâ‘isü’l-kitâb Hasan Bey b. Abdullah’a bey‘ ettiğini ikrâr eyledi. Mezbûr Hasan bey dahi menzil-i mezkûru kendi mâlıyla li-nefsihî iştirâ eyledi. Vâki‘ ikrâr müşterî-yi merkūm tarafından vicâhen tasdîk edildi. Mubâya‘a-i mezbûre menzil-i mesfûrun sûk-ı sultânîde ve mecma‘-ı nâs olan mahallerde tâlibîn ve râgıbîn beyninde kirâren müzâyede olunup ragabât-ı nâs bi’l-külliye münkatı‘a oldukdan sonra müşârün-ileyh üzerinde semen-i meblağ-ı merkūmda karâr edip ziyâde ile âhar tâlibi olmadığı ecilden vâki‘ oldu. Cerâ zâlike ve hurrire fi’l-yevmi’s-sâdis min-şehri Ramazan el-mübârek li-sene hamse ve elf. Şühûdü’l-hâl: Mustafa b. Mahmud, el-imâm, Hasan Bey b. Ali el-müezzin, Ali Çelebi eş-şehîr bi-Vucûdî, İbrahim b. Ali el-cündî, Yusuf b. Cafer el-müsta‘id?, Mehmed b. Ramazan