İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 411 Hüküm no: 516 Orijinal metin no: [98a-3, Arapça] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eğri Kalesi’nde şehit olan İsmail b. Hamza’nın evinin müzayede ile satıldığı Mahmiye-i Kostantıniyye mahallâtından Ahaveyn mahallesinde sâkin iken bundan akdem Rumeli-i ma‘mûrede vâki‘ Eğri kal‘ası tahtında vefât eden merhûm İsmail b. Hamza’nın muhallefâtına vâzı‘-ı yed olan, mahmiye-i Kostantıniyye’de vâki‘ Beytü’l-mâl-i hâssın emîni fahrü’l-akrân Mehmed Çavuş b. Abdülmennan ve müteveffâ-yı merkūmun zevcesi Meryem bt. Abdullah nâm hatun meclis-i şer‘a hâzırân olup müteveffâ-yı mezbûrun muhallefâtı dâhilindeki, mahalle-i mezkûrede kâin, fevkānî bir hâneyi, sofayı, tahtânî iki odayı, su kuyusunu, cüneyneyi ve su kuyusu etrâfındaki eşcâr-ı müte‘addideyi hâvî, hudûdu bir tarafından müşterî-yi mezbûr mülkü ile, bir tarafından Mehmed Çelebi b. Emrullah mülkü ile, bir tarafından Âişe Hatun bt. Ferhad mülkü ile, bir tarafından da tarîk-ı âm ile mahdûd bulunan cemî‘ menzili cümle tevâbi‘i ve levâhıkıyla îcâb kabûlü ve teslîm tesellümü hâvî bey‘-i bâtt-ı sahîh-i şer‘î ile râyicü’l-vakt otuz bin akçe semen-i mu‘ayyen-i makbûzla hâmil-i hâze’l-kitâb Abdülgani Çelebi b. Mehmed’e bey‘ ettiklerini ikrâr eylediler. Mezbûr Abdülgani Çelebi dahi menzil-i mezbûru kendi mâlıyla ve li-nefsihî iştirâ eyledi. Vâki‘ ikrâr müşterî-yi merkūm tarafından bi’l-muvâcehe tasdîk edildi. Mubâya‘a-i mezbûre menzil-i mesfûrun sûk-ı sultânîde ve mecma‘-ı nâs olan mahallerde tâlibîn ve râgıbîn beyninde kirâren müzâyede olunup ragabât-ı nâs bi’l-külliye münkatı‘a oldukdan sonra müşârün-ileyh üzerinde semen-i meblağ-ı merkūmda karâr edip ziyâde ile âhar tâlibi olmadığı ecilden vâki‘ oldu. Vaka‘a’l-işhâd ve’t-tahrîr fî-evâsıtı şehri Ramazan li-sene hamse ve elf. Şühûdü’l-hâl: İbrahim b. Ali el-imâm, Abdurrahman b. İsa el-müezzin, Hasan b. Abdullah, Ali Çelebi b. el-Hâc Cafer, el-Hâc Ahmed b. Abdullah, Turgut b. ( ), (…), Mustafa b. Mahmud