İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 412 Hüküm no: 517 Orijinal metin no: [98b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbn-i Meddas mahallesinde vefat eden Üveys Kethuda’nın borcunun muhallefatından alındığı Atebe-i aliyye (…) Haydar Kethudâ b. Abdülmennan kıbelinden husûs-ı âtîye Mahmud Çavuş b. Ramazan ve Mustafa Bey [b.] Hüsrev şehâdetleri ile ale’n-nehci’ş-şer‘î vekâleti sâbite olan fahrü’l-cüyûş Ali Çavuş b. Ali meclis-i şer‘-i şerîfde bundan esbak mahrûse-i İstanbul’da İbn-i Meddâs mahallesinde vefât eden merhûm Üveys Kethudâ b. Abdullah’ın ebnâ-yı sıgārı Hasan ve Mustafa ve Mehmed’in vasîyy-i muhtârı olan düstûr-ı mükerrem müşîr-i efham müdebbir-i umûri’l-cumhûr bi’l-fikri’s-sâkıb mütemmim-i mehâmmi’l-enâm bi’r-re‘yi’s-sâib Siyavuş Paşa b. Abdülmennan bâb-ı? âlîlerinden husûs-ı âti’l-beyâna alâ-nehci’ş-şer‘î vekâleti sâbite olan Yusuf Çavuş b. Abdülmennan mahzarında takrîr-i merâm edip müvekkilim mûmâ-ileyh Haydar Kethudâ’nın karz-ı şer‘îden müteveffâ-yı merkūm Üveys Kethudâ üzerinde olup ale’n-nehci’ş-şer‘î sâbit ve mahkûmün bi’l-edâ olan iki bin akçeyi muhallefât-ı müteveffâ-yı vekîl-i mesfûr Yusuf Çavuş yedinden bi’t-tamam ve’l-kemâl alıp kabz etdim deyü ikrâr-ı tav‘î etdikde mâ-vaka‘a gıbbe’t-tasdîk kayd olundu. Tahrîren fi’l-yevmi’s-sâmin aşer min-Ramazan sene 1005. Şühûdü’l-hâl: el-Hâc Kurd b. el-Hâc Mehmed, el-Hâc Hasan b. Bayram, Hasan b. Şaban, Osman b. Abdullah, Mehmed b. Ramazan, Mustafa b. Mahmud ve gayruhum.