İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 412 Hüküm no: 518 Orijinal metin no: [98b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Bey tarafından istiğlal yoluyla satılan ev Mahmiye-i İstanbul’da Davud Bey vakfına bi’l-fi‘il mütevellî olan Hasan b. Abdullah nâm kimesneden mahfil-i kazâda yine mahmiye-i merkūmede Sancakdâr Hayreddin mahallesi ahâlisinden olup Rumeli’nde Yenişehir’de müteveffât olan Âlime Hatun bt. Abdullah’ın muhallefâtına mahmiye-i merkūmede Beytü’l-mâl-i hâs emîni olduğu hasebi ile vâzı‘ü’l-yed olan Mehmed Çavuş b. Abdülmennan mahzarında vech-i âtî üzere da‘vâ ve istişhâd sudûrundan sonra eş-Şeyh Pîrî b. Ali ve Ali b. Hasan li ecli’ş-şehâde mahfil-i kazâya hâzırân olup gıbbe’l-istişhâd fi’l-hakīka müteveffât-ı merkūme Âlime Hatun bt. Abdullah mahalle-i mezbûrede vâki‘ olup bir tarafdan el-Hâc Süleyman b. Abdullah mülkü ile bir tarafdan Emir b. Hızır mülkü ile bir tarafdan Hatice mülkü ile bir tarafdan tarîk-i hâs ile mahdûd olan mülk menzilini cemî‘-i hudûd ve levâhıkıyla müteveffâ-yı merkūm Hasan Bey bizim huzûrumuzda bin dört Cemâziyelâhiri gurresinde on sekiz bin nakd-i râyic akçeye bey‘ edip kabz-ı semen ve teslîm-i mebî‘ kıldıkdan sonra ba‘de’t-tahliyeti’ş-şer‘iye menzil-i merkūmu yine târih-i merkūmdan iki yıl tamamına değin üç bin altı yüz akçe ücret-i mu‘accele ile istîcâr etmeğin mesfûr Hasan Bey dahi vech-i meşrûh üzere îcâr eyledi biz bu husûsa şâhidleriz şehâdet-i şer‘iye dahi ederiz deyü bi’l-muvâcehe edâ-i şehâdet-i etdiklerinde gıbbe’t-tezkiye ve’t-ta‘dîl ve gıbbe’t-tahlîf ihtiyâten mûcebiyle hükmolunmağın mâ-vaka‘a gıbbe’t-taleb ketb olundu. Evâil-i Ramazan sene 1005. Şühûdü’l-hâl: es-Sâbikūn