İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 415 Hüküm no: 524 Orijinal metin no: [99b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Eğri kalesinde vefat eden Nurullah Çavuş’un Gürcü asıllı cariyesini hibe etmiş olduğu Mahmiye-i İstanbul’da Mesih Paşa-yı atik mahallesinde sâkin işbu târih-i kitâbda fethi müyesser olan Eğri kal‘ası altında vefât eden merhûm Nurullah Çavuş b. << Armağan nâm kimesnenin zevcesi ve vârisesi olan umdetü’n-nisvân Mâhırânâ Hatun bt. Abdurrahman tarafından husûs-ı âti’z-zikre vekîl olup hasm-ı şer‘î mahzarında bimâ hüve nehcü’s-sübût umdetü’l-ekâbir ve’l-a‘yân Ahmed Ağa b. Abdülmennan ve kıdvetü’l <> emâcid ve’l-ekârim İbrahim Ağa b. Abdülkerim şehâdetleri ile vekâleti sâbite olan Dergâh-ı âlî bevvâblarından fahrü’l-akrân Hasan Bey b. Abdülmennan mahfil-i kazâda müteveffâ-yı mezbûrun sulbî oğlu Sefer nâm sagīre kıbel-i şer‘den mansûb vasîsi olan Emrullah Çavuş b. Armağan mahzarında takrîr-i da‘vâ edip müteveffâ-yı mezbûr Nurullah Çavuş müvekkilem mûmâ-ileyhâ Mâhırânâ Hatun’u tezevvüc etdiği zamanda leyle-i <> zifâfda Gürciyyetü’l-asl Râziye bt. Abdullah nâm dellâke câriyesini müşârün-ileyhâ müvekkileme üzengilik deyü hîn-i duhûlda hibe ve temlik edip müvekkilem dahi kabûl ve kabz edip ile’l-ân tasarrufundadır. Câriye-i mezbûre müvekkilem mezbûrenin mülk-i mahzı ve hakk-ı sırfıdır vâki‘ hâl suâl olunsun dedikde gıbbe’s-suâl ve akībe’l-inkâr ve’l-istişhâd udûl-i Müslimînden zübdetü’l-a‘yân Mehmed Ağa b. Abdullah ve fahrü’l-cüyûş Abdülkerim Çavuş b. Mustafa ve Rabia Hatun bt. Mustafa ve Mihriban Hatun bt. Abdullah mahfil-i kazâya li-ecli’ş-şehâde hâzırûn olup istişhâd olundukda fi’l-vâki‘ mezbûr Nurullah Çavuş b. <> Armağan mezbûre Mâhırânâ Hatunu tezevvüc etdikde leyle-i mezbûrede bizim huzûrumuzda hîn-i duhûlda câriye-i mezbûresini müşârün-ileyhâ Mâhırânâ Hatun’a hibe ve temlik <> edip mezbûre Mâhırânâ Hatun dahi kabûl ve kabz eyledi. İle’l-ân tasarrufundadır bu husûsa şâhidleriz şehâdet dahi ederiz dediklerinde ba‘de’t-ta‘dîl şehâdetleri hayyiz-i kabûlde vâki‘ olmağın mûcebiyle hükmolunup mâ-vaka‘a bi’t-taleb kayd-şüd. Fî-evâili Şa‘bân li-sene hamse ve elf. Şühûdü’l-hâl: Yusuf b. Memi el-bevvâb Mustafa Bey el-bevvâb, Mehmed b. Ramazan, Mustafa b. Mahmud, Mehmed b. Hamza, Ferhad, Musa Bey.