İstanbul Mahkemesi 191 Numaralı Sicil (H. 1000-1027 / M. 1591-1617) cilt: 44, sayfa: 416 Hüküm no: 526 Orijinal metin no: [100a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed Efendi’nin muhallefatına dahil edilmek istenen eşyanın başkasına ait olmasından dolayı geri verildiği Mahrûse-i İstanbul’da Mesih Paşa-yı atik mahallesinde vâki‘ Nurullah Çavuş evinde sâkin iken kasaba-i Hayrabolu’da vefât eden es-Seyyid Mehmed Efendi b. es-Seyyid Davud’un zevce-i metrûkesi Râziye bt. Ahmed mahfil-i kazâda merhûm-ı merkūmun sagīre-i sulbiyesi Neslihan’ın tesviye-i umûrı’çün hâkim-i şer‘î kıbelinden mansûb vasî olan fahrü’l-hutebâ Bali Çelebi b. Süleyman mahzarında ikrâr ve takrîr-i kelâm edip kendi mülk-i hâlisim olan işbu altı pâre serâseri ve bir telli hâreyi ve bir tülbendi ve bir serâser kuşağı müteveffâ-yı mezbûrun muhallefâtındandır deyü kısmete dâhil olmak için vasîyy-i merkūm Bali Çelebi kabz eyleyip lâkin esbâb-ı merkūme müteveffâ-yı mezbûrun olduğunu isbâtâ kādir olmamağın bi-hasebi’ş-şer‘i’ş-şerîf bana yemîn müteveccih oldukda esbâb-ı merkūme kendi mülk-i mahz ve hakk-ı bahtım olup müteveffâ-yı mezbûrun alâka ve medhali olmadığına hâkim-i şer‘î huzûrunda bana yemîn vermiş idi. El-hâletü hâzihî esbâb-ı merkūmeyi bi-aynihâ mezbûr Bali Çelebi yedinden bizzât kabz ve tesellüm eyledim, yedinde bir şey kalmadı dedikde vech-i meşrûh üzere ikrârını vasîyy-i merkūm Bali Çelebi vicâhen ve şifâhen tasdîk ve tahkīk eyleyip vâki‘ hâl bi’t-taleb kayd olundu ki lede’l-ihtiyâc ihticâc ede. Tahrîren fi’l-yevmi’s-sâlis ve’l-ışrîn min-Ramazan li-sene hamse ve elf. Şühûdü’l-hâl: Mehmed Çavuş el-emîn, Mehmed Bey b. Pervîz el-kâtib, Fahrü’l-müderrisîn Ahmed Efendi, Yusuf Çelebi b. Abdülaziz.