İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 105 Hüküm no: 50 Orijinal metin no: [10b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Petro v. Yuvan’ın kendisine miras kalan bakkal gediğindeki hisselerini Arabsunlu Bezircioğlu Nikola v. İstavri’ye satması Bakkal mübâya‘ası 5000 guruş Kezâlik vilâyet-i Anadolu’da medîne-i Kayseriye muzâfâtından İncesu kasabası mahallâtından Kuyubaşı mahallesinde sâkin iken işbu târih-i rakīmden altı sene mukaddem fevt olan teba‘a-i Devlet-i aliyye’den Rum milletinden ve havyarcı esnâfından Avakim v. Mihal v. Adam’ın verâseti sulbiye kebîre kızları yine teba‘a-i Devlet-i aliyye’den ve millet-i merkūme nisvânından Marya ve Magdeleni’ye münhasıra ba‘dehû merkūme Magdeleni dahi fevt olup verâseti ancak sadrî kebîr oğlu yine teba‘a-i Devlet-i aliyye’nin Rum milletinden ve bakkal esnâfından Petro v. Yuvan’a münhasıra ve mesele-i mirâsları bi-hükmi’l-münasahati’ş-şer‘iyye iki sehimden sehmân-ı mezkûrândan bir sehmi merkūme Marya’ya ve bir sehmi merkūm Petro’ya isâbeti tahakkukundan sonra merkūm Petro meclis-i şer‘-i şerîf-i hatîrde teba‘a-i Devlet-i aliyye’den ve millet-i merkūmeden olduğu ba-ilmühaber mütehakkık olan bakkal esnâfından bâ‘isü’r-rakīm Arabsunlu Bezircioğlu Nikola v. İstavri muvâcehesinde esnâf-ı merkūme pazarbaşısı tarafından mürsel çarıkbaşı Simon v. Yorgi, yine esnâf-ı merkūme çarıkbaşısı Yakof v. Moysi ve esnâf-ı merkūmeden Hacı Pretamos v. Mina ve Yuvan v. Kiryako ve Nikola v. Mina ve Avraham v. Tanaş hâzır oldukları hâlde ikrâr-ı tâm ve takrîr-i kelâm edip İstanbul’da Çarsamba pazarı kurbünde Drağman nâm mahalde çeşme karşısında vâki‘ bir tarafdan hallâc dükkânı ve bir tarafdan menzil arsası ve tarafeyni tarîk-i âm ile mahdûd merhûm Baltacı Mahmud Ağa Vakfı müsakkafâtından olarak İsmail Efendi’nin bâ-temessük-i mütevelli taht-ı tasarrufunda bulunan Hacı Sefer dükkânı demekle arîf bir bâb vakıf bakkal dükkânı derûnunda mevcûde şehriye altı buçuk guruş mülk kirâlı beyne’l-esnâf bakkal gediği ta‘bîr olunur âlât-ı lâzime-i ma‘lûmenin yüz yirmi sehm i‘tibârıyla elli beş sehm hisse-i şâyi‘ası ber-vech-i vakfiyyet âharların yedlerinde mülkleri olup mâ‘adâ altmış beş sehm hisse-i şâyi‘ası dahi mûrisimiz müteveffâ-yı evvel merkūm Evakim’in hayâtında yedinde olup iki yüz kırk beş senesi Cumâdelûlâsının selhi târihiyle müverraha ve ol târihde Dârü’l-hilâfeti’l-aliyye kādısı olan Yusuf Paşazâde Mehmed Nazif Beyefendi merhûmun imzâ ve hateminihâviye işbu bir kıt‘a hüccet-i şer‘iyye nâtıka olduğu üzere ile’l-fevt yedinde mülkü ba‘de fevtihimâ ber mûceb-i münâsaha-i şer‘iyye-i mezkûre benimle merkūme Marya’ya mevrûs olmağla ben akd-i âti’z-zikrin sudûruna değin âlât-ı gedik-i mezkûrdan ber-minvâl-i muharrer irsen mâlik olduğum otuz iki buçuk sehm hisse-i şâyi‘amı tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile şerîkem merkūmenin izniyle beş bin guruşa merkūm Nikola’ya bey‘ ve temlîk ve vech-i lâyıkıyla teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl eyledikden sonra semeni olan meblağ-ı mezkûr beş bin guruşu tamâmen bana def‘ u teslîm ben dahi yedinden bi’t-tamâm ve’l-kemâl ahz u kabz edip mebî‘-i mezkûrun tağrîr ve gabnine müte‘allika da‘vâdan tarafeynden her birimiz ber-minvâl-i muharrer âharın zimmetini ibrâ-yı sahîh-i şer‘î ile kabûlümüzü hâvî ibrâ vü ıskāt eyledik ba‘de’l-yevm âlât-ı gedik-i mezkûrun ber mûceb-i münâsaha-i mezkûre otuz iki buçuk sehm hisse-i şâyi‘asında benim aslâ ve kat‘â alâka ve medhalim kalmayıp merkūm Nikola’nın mülk-i müşterâsı ve hakk-ı sırfı olmuşdur dedikde gıbbe. Fî 17 Zilka‘de sene 1278 Şuhûdü’l-hâl: Muhzır İsmail Ağa b. ( ), Muhzır Süleyman Ağa b. ( ), Muhzır Mustafa Ağa b. ( ), Muhzır Feyzullah Ağa b. ( ), ve gayruhum