İstanbul Mahkemesi 211 Numaralı Sicil (H. 1278-1279 / M. 1862-1863) cilt: 98, sayfa: 104 Hüküm no: 49 Orijinal metin no: [10b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Ağa b. Mehmed’in ölümünden sonra kendilerine miras kalan berber dükkânı hisselerinin mülkleri olduğuna dair mirasçılarının hüccet talebi Husûs ile berber ihbârı Kezâlik husûs-ı âti’l-beyânın mahallinde ketb ü tahrîri için savb-ı şer‘-i enverden bi’l-iltimâs irsâl olunan Kâtib es-Seyyid el-Hâc Ahmed Aziz Efendi mahmiye-i İstanbul hısnı ebvâbından bâb-ı Caferî hâricinde vâki‘ tütüncü esnâfının lonca odasına varıp zeyl-i kitâbda muharrerü’l-esâmî müslimîn huzûrlarında akd-i meclis-i şer‘-i âlî etdikde mahrûse-i Galata’ya muzâfe kasaba-i Tophane’de Yazıcı Mehmed Efendi mahallesinde sâkin iken bundan mukaddem vefât eden İsmail Ağa b. Mehmed’in verâseti zevce-i menkûha-i metrûkesi Emine Hanım bt. Mehmed ile mezbûreden mütevellidler sulbî kebîr oğlu esnâf-ı merkūme kethüdâsı el-Hâc Mehmed Latif Efendi ve sulbiye-i kebîre kızı Fâtıma Hanım’a münhasıra ve tashîh-i mes’ele-i mirâsları yirmi dört sehimden olup sihâm-ı mezkûreden üç sehmi zevce-i mezbûre Emine Hanım’a ve on dört sehmi mezbûr el-Hâc Mehmed Latif Efendi’ye ve yedi sehmi dahi mezbûre Fâtıma Hanım’a isâbeti lede’ş-şer‘î’l-enver zâhir ve mütehakkık oldukdan sonra bâ‘isetü’l-kitâb zâtı ta‘rîf-i şer‘î ile mu‘arrefe olan zevce-i mezbûre Emine Hanım mezbûr el-Hâc Mehmed Latif Efendi ve kezâlik zâtı ta‘rîf-i şer‘î ile mu‘arrefe olan mezbûre Fâtıma Hanım hâzır oldukları hâlde meclis-i şer‘-i şerîf-i enverde mahrûse-i merkūmede vâki‘ berberân esnâfının kethüdâsı Ahmed Zemcî Efendi b. el-Hâc Mustafa tarafından mürsel vekîli esnâf-ı merkūme çavuşu Hurşid Ağa b. Abdullah hâzır olduğu hâlde bi’l-verâse takrîr-i kelâm ve ta‘bîr ani’l-merâm edip mahrûse-i mezkûrede Bereketzâde mahallesinde Kemeraltı nâm mahalde vâki‘ bir tarafdan Himmetoğlu İbrahim Çavuş’un sulbî kebîr oğulları Rıza Efendi ve Ahmed Muhtar Efendi’nin berber dükkânı ve bir tarafdan merhûm Emin Hayreddin Vakfı’ndan menzil havlusu ve tarafeyn-i tarîk-i âm ile mahdûd merhûm-ı mûmâ-ileyh Emin Hayreddin Vakfı müsakkafâtından benimle mezbûrân el-Hâc Mehmed Latif Efendi ve Fâtıma Hanım ve mezbûrân Rıza Efendi ve Ahmed Muhtar Efendi’nin taht-ı tasarrufumuzda olan şehriye yedi buçuk guruş kirâlı bir bâb berber dükkânı derûnunda mevcûde beyne’l-esnâf gedik ta‘bîr olunur âlât-ı lâzime yedimde olup bin iki yüz kırk beş senesi şehr-i Ramazani’l-mübârekinin on dördüncü günü târihiyle müverraha ve ol târihde mahrûse-i merkūme kādısı olan es-Seyyid Ali Satı‘ Efendi merhûmun imzâ ve hateminihâviye işbu bir kıt‘a hücccet-i şer‘iyye mantûkunca zevcim ve mûrisimiz müteveffâ-yı mezbûr İsmail Ağa’nın hayâtında müstakillen yedinde mülkü iken mezbûr İsmail Ağa hayâtında ber-minvâl-i muharrer mâlik olduğu âlât-ı gedik-i mezkûrun selâse-i erbâ‘ hisse-i şâyi‘asını yedinde bi’l-ibkā mâ‘adâ bir rub‘ hisse-i şâyi‘asını tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i ve şer‘î ve safka-i vâhide ile bana bin yüz elli guruş semen-i makbûza bey‘ ve temlîk ve vech-i lâyıkıyla teslîm eylediğinde ben dahi ber-vech-i muharrer iştirâ ve temellük ve tesellüm ve kabz u kabûl eylediğimden sonra mezbûr İsmail Ağa âlât-ı gedik-i mezkûrun selâse-i erbâ‘ hisse-i şâyi‘a-i merkūmesi yedinde mülkü olduğu hâlde vefât ettikde selâse-i erbâ‘ hisse-i âlât-ı gedik-i mezkûr ber-tashîh-i merkūm benimle hâzırân-ı mezbûrân el-Hâc Mehmed Latif Efendi ve Fâtıma Hanım’a mevrûs ve ol-vechile âlât-ı gedik-i mezkûr el-yevm yedimizde mülkümüz olup lâkin âlât-ı gedik-i mezkûr ber-vech-i meşrûh benimle hâzırân-ı mezbûrânın mülkümüz olduğunu nâtık yedimizde sened-i şer‘î olmamağla hakīkat-i hâl vukūf-ı tâmları olan kimesnelerden lede’s-suâl haberleri tahrîr ve imlâ ile kıbel-i şer‘ den âlât-ı gedik-i mezkûr ber-minvâl-i muharrer benimle hâzıran-ı mezbûrânın mülkümüz olduğunu nâtıka yedimizde bir kıt‘a hüccet-i şer‘iyyei‘tâ buyurulmak murâdımızdır deyu kethüdâ-yı mezbûr Ahmed Zemcî Efendi’nin takdîm eylediği bir kıt‘a ilmühaberi ibrâz ve hâzırân-ı mezbûrân el-Hâc Mehmed Latif Efendi ve Fâtıma Hanım’ın tasdîkleriyle ma‘ân istdi‘â etdiklerinde hâl merkūmûn Emine Hanım ve el-Hac Mehmed Latif Efendi ve FâtımaHanım’ın bâlâda bast ve beyân eyledikleri minvâl üzere olduğunu husûs-ı mezkûre vukūf-ı tâmları olan hâzır-ı mezbûr Hurşid Ağa ile zeyl-i kitâbda muharrerü’l-esâmî müslimînden her biri alâ tarîki’ş-şehâde haber verdiklerini kâtib-i mûmâ-ileyh. Fi 19 Zilhicce sene 1278 Şuhûdü’l-hâl: Muhzır Osman Ağa b. ( ), Çukadâr Mustafa Ağa b. ( ), Yiğitbaşı Receb Ağab. ( ), Tütüncü esnâfı yazıcısı Ahmed Efendi b. el-Hâc Mehmed, Kethüdâ vekîli Ahmed Efendi b. Osman, Berberân esnâfının mahrûse-i merkūme kolu köşe ustası el-Hâc Mustafa Ağa b. Ahmed, ve gayruhum